بيزنەستى تاڭدادىم: ءماسليحات دەپۋتاتى ورنىن بوساتتى
حالىق قالاۋلىسى ەرلان ستامبەكوۆ فەيسبۋكتەگى پاراقشاسىندا بيزنەسىندە جاڭا جوبالاردىڭ پايدا بولۋىنا بايلانىستى دەپۋتاتتىقتان كەتەتىنىن مالىمدەگەن.
«مەن ءوزىمنىڭ سەرىكتەستەرىممەن بىرىگە وتىرىپ، بىرنەشە حالىقارالىق جوبانى جۇزەگە اسىرۋىم كەرەك. ارينە، وعان كوپ كۇش جۇمساۋ كەرەك. ۇزاق ۋاقىتقا ءىس ساپارعا كەتۋ كەرەك بولادى. ورنىمدا ءبىر كۇن بار، ءبىر كۇن جوق بولسام، ول مەنىڭ دەپۋتاتتىعىما سىن ەمەس پە؟ ماعان سەنىپ داۋىس بەرگەن ازاماتتاردىڭ سەنىمىن اقتاماعانىم بولادى. وسىعان بايلانىستى ناقتى شەشىم قابىلدادىم. ەگەر اياقسىز قالدىرعان دۇنيەلەرىم بولسا، مەنىڭ ورنىما سايلاناتىن دەپۋتاتقا قالدىرىپ كەتۋگە تىرىسامىن. الماتى قالاسى ءماسليحاتىنىڭ ۇجىمىنا، بىرگە جۇمىس جاساعان ارىپتەستەرىمە ماعان بەرگەن ۇلكەن تاجىريبەلەرى ءۇشىن العىس بىلدىرەمىن» ، - دەدى ول جازباسىندا.
ال قالالىق ورتالىق سايلاۋ كوميسسياسى ءتورايىمىنىڭ ورىنباسارى ايگۇل حاسانوۆا ەرلان ستامبەكوۆتەن ەشقانداي ءوتىنىش تۇسپەگەنىن ايتتى.
« ءدال قازىر ستامبەكوۆتەن ەشقانداي ارىز تۇسپەدى. ول كىسى ءوزىنىڭ رەسمي ءوتىنىشىن وتكىزگەن سوڭ، بەلگىلى ءبىر شارالاردى وتكىزەمىز. سودان سوڭ قوسىمشا سايلاۋ تۋرالى ماسەلە قاراستىرىلادى» ، - دەدى ايگۇل حاسانوۆا.
ايتا كەتۋ كەرەك، الماتىدا بيىل 2 وكرۋگ بويىنشا دەپۋتاتتار ورنىن بوساتقان بولاتىن. ولاردىڭ ءبىرى مەملەكەتتىك قىزمەتكە كەتسە، ەكىنشىسى سوت ۇكىمىنەن سوڭ دەپۋتاتتىق مانداتىن تاپسىردى.
فوتو: vecher.kz
