قانمەن سالىنعان كەسەنەنى كوردىڭىز بە؟
سىر وڭىرىندە قوينىنا نەبىر قۇپيا سىردى بۇگىپ جاتقان كيەلى ورىندار كوپ. سولاردىڭ ءبىرى - كەلىمبەت بابا كەسەنەسى.
قوجاباقى اۋىلىنىڭ تۇرعىنى، اقىن ءامىرحان قاناي ۇلىنىڭ ايتۋىنشا، كەلىمبەت كەسەنەسى شامامەن 1898-جىلى تۇرعىزىلعان. اراندى اۋىلىنان وڭتۇستىك-شىعىسقا قاراي 5 شاقىرىم، قوجاباقىدان باتىسقا 8 شاقىرىم قاشىقتىقتا ورنالاسقان. ەسكەرتكىش - مەملەكەت قورعاۋىندا.
«كەلىمبەت بابا اسان رۋىنىڭ مامەتەگىنەن تاراعان. ونىڭ كەسەنەسىن قوجاباقىلىقتار «كەلىمبەت تامى» دەپ اتاپ كەتكەن. جالپى دەرەك كوزدەرىنە سۇيەنسەك، كەلىمبەت XIX عاسىردا ءومىر سۇرگەن كىسى ەكەن. زامانىندا ءوزى «باي بولساڭ، حالقىڭا پايداڭ ءتيسىن» دەگەن اتالى ءسوزدى ۇستانىپ، حالىققا قايىرىمى مول جان بولىپتى دەسەدى. ەل اۋزىنداعى اڭگىمەلەر بويىنشا ول كىسىنىڭ اۋليەلىك قاسيەتتەرى دە بولىپتى. ءبىر كۇنى كەلىمبەت دارەت الاتىن شاينەگىنە سۋ قۇيىپ، وتقا قويسا، جازدىڭ وزىندە شاينەكتەگى سۋ ەرتەڭىنە قاتىق بولىپ ۇيىپ تۇرىپتى. وسىنى كورگەن ول ەلىن جيناپ، ۇيىعان قاتىق سۋدى بىرگە ءبولىپ ءىشىپ، جۇرتتى ۇيىعان ايرانداي بولۋعا، اۋىزبىرشىلىككە، ىنتىماققا شاقىرعان»، - دەيدى ءامىرحان قاناي ۇلى.
اۋليە قولعا العان ىستە بار جانە قۇدايدىڭ ريزالىعىنا بولەنۋ ءۇشىن ءاربىرىن يگى نيەتپەن باستايتىن بولعان. كوزىنىڭ تىرىسىندە كەلىمبەت حالقىن جيناپ، ەلىمىز ايرانداي ۇيىسىن، ەمەن بۇتاعىنداي قاۋلاسىن دەگەن پەيىلمەن ۇلكەن ءۇي تام تۇرعىزعان.
«كۇنىنە ونشاقتى جىلقى سويعان، ونىڭ قانىن، جال-قۇيرىعىن بالشىققا قوسقان. ءسويتىپ، بالشىقتى قانعا ابدەن يلەپ، ءۇي تامنىڭ بويىن تۇزەگەن. ءارى ءۇيدى سالعان ادامدار دارەتسىز جۇرمەگەن. سوندىقتان، ءۇي تامنىڭ كىرپىشى سۋعا ەرىمەيدى، وتقا ورتەنبەيدى. كەلىمبەتتىڭ كوزى تىرىسىندە سالىنعان تامعا ءوزى، ايجىگىت، ءداۋىت اتتى ۇلدارى مەن اناسى، جۇبايى جەرلەنگەن» ، - دەيدى قوجاباقى ەلدى مەكەنىنىڭ تاعى ءبىر تۇرعىنى دارحان بەكجانوۆ.
تەكتىدەن تەكتى تارايدى ەمەس پە، كەلىمبەتتىڭ ۇلى ايجىگىت 18 جىل بولىس بولىپ، ەلىنە سىيلى ازامات اتانعان. قازىرگى تاڭدا كەلىمبەت بابانىڭ ۇرپاقتارى داريا بويىنداعى قونىس تەپكەن اۋىلداردا تۇرىپ كەلەدى.
سارسەنقۇل نازار.
سۋرەتتەر اۆتوردىكى
