تەرەڭ جارىقشاقتان قۇرلىق قاق ايىرىلىپ، ەكىگە ءبولىنۋى مۇمكىن - فوتو، ۆيدەو
نەشە مىڭ شاقىرىمعا سوزىلعان جارىقشاق ايماقتاعى سەيسميكالىق بەلسەندىلىكتىڭ اسەرىنەن پايدا بولعان. بۇل جارىقشاق نايروبي - ناروك كۇرەجولىنىڭ ءبىر بولىگىن ءبۇلدىرىپ، پايدالانۋعا جارامسىز ەتىپ تاستادى. افريكانىڭ شىعىسىنداعى ارقالى جازىقتىقتى قالىپتاستىرعان جارىقشاق 3000 شاقىرىمعا سوزىلىپ جاتىر ءارى افريكالىق تاقتانى ءبىر-بىرىمەن تەڭ ەمەس - سوماليلىك جانە نۋبيلىك تاقتالارعا ءبولىپ جاتىر.
بۇل تاقتالار ءبىر-بىرىنەن جىلىنا 2,5-5 سانتيمەترگە ۇلعايىپ وتىرادى. وڭتۇستىگىنە قاراي جارىقشاقتىڭ پايدا بولعانىنا كوپ ۋاقىت وتە قويماعاندىقتان تەز ۇلعايىپ بارادى، ال سولتۇستىگىندەگىسىنە كەلسەك، جازىقتىقتىڭ تۇگەلى دەرلىك جانارتاۋ جىنىستارىمەن كومكەرىلگەن. بۇل ءوز كەزەگىندە ليتوسفەرانىڭ تولىق جويىلعانىنان حابار بەرەدى.
ءسوز ورايى كەلگەندە ايتا كەتۋ كەرەك، وسىدان 138 ميلليون جىل بۇرىن وسىنداي قۇرلىقتىق جارىقشاقتان اتلانت مۇحيتى پايدا ولعان ەدى. ول كەزدە افريكا مەن وڭتۇستىك امەريكا ءبىر- بىرىنەن ءبولىنىپ، قاشىق كەتكەن ەدى. دەسە دە اتالعان ەكى قۇرلىقتىڭ جاعالاۋلارىنىڭ سىزىقتارى ءالى كۇنگە ءبىر-بىرىمەن سايكەس كەلەدى. ءبىز ءسوز ەتىپ وتىرعان جارىقشاق مۇحيت سۋىمەن تولىپ، افريكا قۇرلىعىنىڭ ءبىر بولىگى (ەفيوپيا مەن سوماليدى قوسا العاندا) ۇلكەن ارالعا اينالۋى مۇمكىن.
