قىزىلوردا مەكتەبىندە قۇستار باعى بار - فوتو
وندا وقۋشىلار بۇركىتپەن بىرگە ۇكى، قىرعاۋىل جانە مىسىر تاۋىعى سەكىلدى قۇستارمەن جەتە تانىسا الادى، دەپ حابارلايدى قازاقپارات.
بۇل يگى ىسكە ۇيتقى بولعان حيميا-بيولوگيا ءپانىنىڭ مۇعالىمى گۇلنار رەكەشوۆا. ول وقۋ بارىسىن تاجىريبەمەن ۇيلەستىرە وتىرىپ، ورنيتولوگيا سالاسىنا ءوز ۇلەسىن قوسىپ كەلەدى. سونداي-اق، مەكتەپتە بۇركىتتىڭ كۇتىمىنە جاۋاپتى ارنايى مامان قاراستىرىلعان. بۇل ءىستى ەربولات ماحانوۆ اتقارادى.
«بۇركىتتى بالاپان كەزىنەن توردا ۇستاپ كەلەمىز، سوندىقتان قازىر قولعا تولىق ۇيرەنىستى دەۋگە نەگىز بار. راس، دارحان دالانىڭ ەركىن قۇسى قاناتىن كەڭگە جايۋى شارت. ءبىر كەزدەرى قولدان ۇشىرىپ العان ءساتىمىز كەزدەستى. دەگەنمەن كوپ ۇزاماي قايتا ورالدى. ءبىز ءاربىر سەنبىدە ونى توردان بوساتىپ، مەكتەپتىڭ سپورت زالىنا بوس جىبەرەمىز. وعان ءبىرىڭعاي ەت ءونىمىن بەرەمىز. كۇنىنە 300-400 گرامم ەت جەيدى. اۋىرىپ قالعان جاعدايدا ۆەتەرينار مامانىنىڭ كومەگىنە جۇگىنەمىز»، دەيدى ە. ماحانوۆ.
ونىڭ ايتۋىنشا، بۇل قۇس سىر بويىنىڭ بۇركىتى ەكەن. ول بۇركىتتىڭ ءتۇر-تۇسىنە قاراي انىقتالعان. قازىر جاسى ۇشتە. بۇركىتتىڭ جاسى وسكەن سايىن وعان بەرىلەتىن ازىق مولشەرى دە ارتىپ كەلەدى. جاڭا سويىلعان مالدىڭ ەتى جىلى كۇيىندە ازىق رەتىندە بەرىلەدى. ال جاز كۇندەرىندە كۇننىڭ ىستىق بولۋىنا بايلانىستى ەتتى ءپىسىرىپ نەمەسە وكپە بەرىلەدى. ءجيى سۋ بەرىپ شومىلدىرادى.
مەكتەپتە جىل سايىن 1 -ءساۋىر - حالىقارالىق قۇستار كۇنىنە وراي ءارتۇرلى شارالار وتەدى. ونى تۇراقتى تۇردە «جاس ورنيتولوگتار» ۇيىرمەسىنىڭ مۇشەلەرى ۇيىمداستىرىپ كەلەدى.
ادىلەت قاڭتاربايەۆ
