سەمەيلىك قۇتقارۋشىلارعا كومەككە ارنايى تەحنيكالار كەلدى

 باسپانالارىن سۋ العان تۇرعىندارعا وسكەمەن جانە پاۆلودار وبلىسىنان ارنايى 19 تەحنيكا مەن 10-نان اسا ادام كومەككە كەلدى. سوڭعى اقپاراتتار بويىنشا 50 تۇرعىن ءۇي مەن 21 اۋلا ءالى دە سۋ استىندا. الداعى 2 كۇندە باسپانالار مەن اۋلالارداعى سۋدى ايداۋ جۇمىستارى تولىق اياقتالماق.

 «وبلىس اكىمىنىڭ تاپسىرماسى بويىنشا وزگە وڭىرلەردەن كومەككە تەحنيكالار كەلدى. قازىر جۇمىس جاساپ جاتىر. اتاپ ايتساق، 2 تىكۇشاق، 15 سۋ ايداعىش قۇرال وسكەمەننەن كەلدى. 2 اەس ماشينا پاۆلودار وبلىسىنان»، - دەدى قالالىق ازاماتتىق قورعانىس جەدەل- شتابىنىڭ اقپاراتتىق قىزمەتىنىڭ وكىلى مەيىرجان امانگەلديەۆ.

قازىر ۇيلەرىن سۋ باسقان 188 ادام قوناقۇيدە. ال 190 تۇرعىن باسپاناسىنا ورالعان. ولارعا كەلتىرىلگەن شىعىن كولەمى انىقتالعاننان كەيىن قاجەتتى كومەك كورسەتىلەدى. ارنايى كوميسسيا جۇمىس ىستەپ جاتىر.

بۇگىن ەرتىستەگى سۋ دەڭگەيى 265 سانتيمەتر بولىپ تۇر.

 ايتا كەتەيىك، جالپى قالا بويىنشا بۇگىن 16 ارنايى تەحنيكا، 21 سۋ ايداعىش قۇرىلعى مەن 64 ادام جۇمىس ىستەپ جاتىر.

اۆتور: شىنار عالىمبەك قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى