تالدىقورعاندا كورەيالىق دارىگەر تەگىن وتا جاسادى
ينحۆا ۋنيۆەرسيتەتى جانىنداعى ايەلدەر ونكولوگيالىق ورتالىعىنىڭ ديرەكتورى پەك نام سوننىڭ وتاسىن تەلەمەديتسينا ارقىلى اۋدان، قالالارداعى ونكولوگتار مەن ماممولوگتار كورىپ وتىردى. وسىلايشا الەمدىك دەڭگەيدە مويىندالعان بىلىكتى مامان ءوز تاجىريبەسىمەن ءبولىستى.
الماتى وبلىسىنىڭ ورتالىعىنا مەديتسينا عىلىمدارىنىڭ دوكتورى پەك نام سون ارنايى شاقىرتۋمەن كەلگەن. ونكولوگ دارىگەر بۇل جولعى ساپارىندا جەرگىلىكتى مەديتسينا سالاسىنىڭ قىزمەتكەرلەرىمەن كەزدەسىپ، شەبەرلىك ءدارىسىن وتكىزدى. ءسۇت جانە قالقانشا بەزىنىڭ قابىنۋىن ەمدەۋ جولدارى تالقىلانعان باسقوسۋدا شەتەلدىك مەيمان بىلگەنىمەن ءبولىسىپ، اقىل- كەڭەسىن ايتتى. قاتىسۋشىلار تاراپىنان قويىلعان سان ءتۇرلى ساۋالدارعا جاۋاپ بەردى. 45 جىلدىق ەڭبەك ءوتىلى بار دارىگەر كورەي، جاپون جانە امەريكا مەديتسينالىق قاۋىمداستىقتارىنىڭ مۇشەسى.
اۆتور: سامال قابىشيەۆا
