روزا رىمبايەۆا جەكە ءومىرى جايلى قۇپيامەن ءبولىستى
ءانشىنىڭ جولداسى مۋزىكانت تاسقىن وقاپوۆ 1999 -جىلى دۇنيە سالعان بولاتىن. ءانشى جان جارىنا دەگەن ساعىنىشىنان سىر شەرتتى.
«مەن شىعارماشىلىق ءۇشىن جەكە ءومىرىمدى قۇربان ەتتىم. مەنىڭ وسىنداي دەڭگەيگە كوتەرىلۋىمە جولداسىم تاسقىن وقاپوۆ ۇلكەن ەڭبەك ءسىڭىردى. سونىڭ ارقاسىندا حالىق ءارتىسى دەگەن اتاق الدىم. ماقساتىم وسى اتاقتى الۋ بولدى دەپ ايتا المايمىن.
سول ۇلكەن ەڭبەكتىڭ ارقاسىندا جەتكەن جەتىستىگىم رەتىندە كورسەتەمىن. تۇڭعىشىم ءاليدى 33 جاسىمدا دۇنيەگە اكەلدىم. ءماديدى توعىز جىلدان كەيىن بوساندىم. بۇل جەردە مەن ارتىستىگىمدى كوتەرەيىن دەپ ءجۇرىپ قالعان جوقپىن. دەنساۋلىعىمدا دا ازداپ ماسەلەلەر بولعان ەدى. اليدەن كەيىن بىرنەشە بالانى قاتارىنان بوسانعانىمدا مۇنداي جەتىستىككە جەتپەس پە ەدىم. كىم ءبىلسىن... قۇداي وسىنداي ەكى ۇل بەردى. شىنىمدى ايتسام انشىلىكتەن دە انا رەتىندە باقىتتىمىن.
ارينە قازىر كۇيەۋىمدى ساعىنامىن. جاسىم كەلگەن سايىن ول كىسىنى ساعىنىپ كەلەمىن. ۋاقىت وتكەن سايىن ماعان قانداي ادامنىڭ جەتىسپەيتىنىن بايقاپ ءجۇرمىن. مەنى قويشى، ءالي مەن ماديگە جەتىسپەيدى.
وتباسى بولعاننان كەيىن رەنجىتكەن ساتتەرىم دە بولدى. شىعارماشىلىقتا تالاي تارتىستىق. مەن وزىمدىكىن دۇرىس دەپ قايتپايتىنمىن. جەكە ومىردە دە ىدىس اياق سىلدىرلامادى دەپ ايتا المايمىن. ول كەزدە ءومىر ءسۇرۋ دە وڭاي ەمەس ەدى. مىنانداي مولشىلىق جوق ەدى.
قازىرگە دەيىن ماعان عاشىقپىن دەپ سەزىمىن بىلدىرەتىندەر كوپ. ءبىراق، تاسقىنمەن سالىستىرىپ وتىرامىن. ەندىگى ادام تاسقىننان اسىپ ءتۇسۋى كەرەك. اسىپ تۇسپەسە وندا ول مەنىڭ ادامىم ەمەس. شىن ايتام، ماعان عاشىق بولعاندار كوپ بولدى. مەن دە ءبىر-ەكى ادامعا قىزىقتىم. ارالاسا كەلە مەنىڭ ادامىم ەمەس ەكەنىن ءتۇسىندىم، قاتەلەسكەن ەكەنمىن» - دەيدى روزا رىمبايەۆا.
دەرەككوز: Reactor
