جەتىنشى ارنادا ءلايلا سۇلتان قىزى بۇرىن-سوڭدى بولماعان جاڭا توك-شوۋ كورسەتپەك
ءبىرى - كورىكتى، قىلىقتى، اقىلدى كەلىنشەك. ەندى ءبىرى - سىمباتتى، قىزبا مىنەز، ازىلكەش جىگىت. قازاقستاندىق تەلەۆيزيادا بۇرىن-سوڭدى بولماعان فورماتتاعى توك-شوۋدى ۇسىناتىن جۇرگىزۋشىلەر دۋەتى كىمدەر دەيسىز بە؟ تىكەلەي ەفير حانشايىمى ءلايلا سۇلتان قىزى كورەرمەنىن ساعىندىرىپ، ستۋديا تورىنە قايتا شىعۋعا دايىندالىپ ءجۇر.
ايتا كەتەيىك، جاقىندا ول وسى ارنانىڭ ديرەكتورلار كەڭەسىنە مۇشە بولدى. ال ونىڭ ارىپتەسىنىڭ ەسىمى ازىرگە جۇمباق. ءبىراق ول دا ءوزىنىڭ ايتارى بار، سۇراقتى توتەسىنەن قوياتىن تەلەجۇرگىزۋشى ەكەنى بەلگىلى. جوبانىڭ تۇپكى ماقساتى - وتباسى قۇندىلىقتارىن ناسيحاتتاۋ. ال بۇل جولدا كەزدەسەتىن باستى كەدەرگى قانداي؟ ومىرلىك سەرىگىمىزدى تىڭداپ، ونىڭ ويىن قابىلداي الماي جاتامىز. سول سەبەپتى اۆتورلار توك- شوۋدىڭ اتىن «ءوز ويىم» دەپ قويعان ەكەن. باعدارلاما قوناقتارى - ءسىز بەن ءبىز سەكىلدى قاراپايىم ادامدار.
اركىمنىڭ كوكەيىندە جۇرگەن ماسەلەلەر، شەشىمى تابىلماي كەلگەن سۇراقتارعا ساراپشىلار، قوعام قايراتكەرلەرى مەن تانىمال ادامدار جاۋاپ بەرەتىن بولادى. دەگەنمەن، بۇل جوبانىڭ تاقىرىپتارىنا شەك قويىلماعان - سپورت پەن شوۋ- بيزنەستەگى جاڭالىقتاردان باستان وتباسىلىق جانجالدارعا دەيىن تالقىعا سالىناتىن بولادى. پروديۋسەرلەردىڭ ايتۋىنشا، بۇل جوبانىڭ باستى وزگەشەلىگى - جۇرگىزۋشىلەردىڭ جۇبىندا.
وسىعان دەيىن ەر ازامات پەن ايەل بىرىگىپ جۇرگىزگەن توك-شوۋ قازاقستاندىق تەلەۆيزيادا بولعان ەمەس. بۇل قادام قانشالىقتى قىزىقتى بولسا، سونشالىقتى قيىن بولارى ءسوزسىز. سەبەبى ءلايلا سۇلتان قىزى دا، ونىڭ ارىپتەسى دە وسىعان دەيىنگى جوبالاردىڭ تىزگىنىن وزدەرى ۇستاپ كەلگەن بولاتىن. ەندى سەرىگىڭنىڭ پىكىرىنە قۇلاق اسىپ، ونىڭ مىنەز-قۇلقىمەن ساناسۋعا تۋرا كەلەدى. بۇل جوبانىڭ قىزىقتى بولۋىنا ستۋدياداعى كورەرمەندەر دە اتسالىسادى. ونىڭ ۇستىنە كەسىپ-پىشۋگە مۇمكىندىگى جوق تىكەلەي ەفير بولعاندىقتان، كەلگەن ءار قوناق جاۋاپتان جالتارا المايدى. تالقىلاناتىن تاقىرىپتار اياسىنىڭ كەڭ، كوزبە-كوز عانا ەمەس، سۇراقتاردى ونلاين جولداۋعا دا بولادى. بۇل كورەرمەن اۋديتورياسىن كەڭەيتەدى.
«سونىمەن، سەيسەنبى مەن جۇما ارالىعىندا 7-ارنانىڭ تىكەلەي ەفيرىنەن جاڭا تەلەجوبانى تاماشالۋعا اسىعىڭىزدار! «ءوز ويىم» توك- شوۋىندا ءار ادام ءوز ويىن ايتۋعا قۇقىلى!»، - دەيدى پروديۋسەرلەر.
Kaz.tengrinews.kz
