باقىتجان ساعىنتايەۆ بايقوڭىر عارىش ايلاعى مەن قالاسىنىڭ دامۋ ناتيجەسىمەن تانىستى
باقىتجان ساعىنتايەۆقا نىساندى ارالاۋ كەزىندە عارىش سالاسىن دامىتۋدىڭ قازىرگى جاعدايى مەن الداعى جوسپارلار، سونىمەن قاتار «بايقوڭىر» كەشەنىندەگى ىنتىماقتاستىق تۋرالى تۇجىرىمدامانى ىسكە اسىرۋ بارىسى، ونىڭ ىشىندە ينۆەستيتسيالاردى تارتۋ بويىنشا اتقارىلىپ جاتقان جۇمىستار تۋرالى باياندالدى.
ق ر قورعانىس جانە ايەروعارىش ونەركاسىبى ۆيتسە- ءمينيسترى م. نۇرعوجين جانە «روس عارىش» مەملەكەتتىك كورپوراتسياسىنىڭ باس ديرەكتورىنىڭ ورىنباسارى ا. مازۋرين «بايقوڭىر» عارىش ايلاعىن ودان ءارى دامىتۋ جوسپارىمەن تانىستىردى.
ءوز كەزەگىندە، قىزىلوردا وبلىسى اكىمىنىڭ ورىنباسارى س. قوجانيازوۆ پەن قالا اكىمشىلىگىنىڭ باسشىسى ك. بۋسىگين بايقوڭىردى ۇزاقمەرزىمدى دامىتۋدىڭ بىرلەسكەن باعدارلاماسىن ورىنداۋ تۋرالى ايتىپ بەردى. قازىرگى تاڭدا قالانى تابيعي گازبەن قامتاماسىز ەتۋ جانە تۇرعىن ءۇي قۇرىلىسى جۇمىستارى باستالعان، سۋمەن جابدىقتاۋ جانە سۋ تارتۋ جۇيەلەرىن رەكونسترۋكتسيالاۋ جانە جاڭعىرتۋدىڭ دايىندىق جۇمىستارى جۇرگىزىلىپ، الەۋمەتتىك ماسەلەلەردى شەشۋ بويىنشا شارالار قابىلدانىپ جاتىر.
ەسكە سالا كەتەيىك، باقىتجان ساعىنتايەۆ ەلباسى تاپسىرماسى بويىنشا كەشە جۇمىس ساپارىمەن وڭتۇستىك قازاقستان وبلىسىنا باردى. ساپاردىڭ ماقساتى - پرەزيدەنت نۇرسۇلتان نازاربايەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك»، «ءتورتىنشى ونەركاسىپتىك ريەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋلارى مەن بەس الەۋمەتتىك باستاماسى اياسىندا بەرگەن تاپسىرمالارىنىڭ جۇزەگە اسىرىلۋ بارىسىمەن تانىسۋ. بۇگىن پرەمەر- ءمينيستردىڭ قىزىلوردا وبلىسىنا جۇمىس ساپارى اياقتالدى.
