تالانتتى فۋتبولشىلاردىڭ الەمدىك رەيتينگىنە «قازاقتان شىققان مەسسي» كىردى

بۇل جايلى اقپارات رەسەيلىك «ۋفا» كلۋبىنىڭ سايتىندا جاريالاندى. وسى كلۋبتىڭ ساپىنا قىستا قوسىلعان ەركەبۇلانعا 114 فۋتبولشىنىڭ اراسىندا 56-ورىن بۇيىردى.

كلۋبتىڭ سايتىندا ەركەبۇلان سەيداحمەتتىڭ سۇحباتى دا جاريالانعان.

«قازاقتان شىققان مەسسي» دەگەن اتقا قالاي قارايسىڭ دەگەن سۇراققا جاس فۋتبولشى: «بارلىعىن جۋرناليستەر ويلاپ تاپقان. مەن بۇعان باسا ءمان بەرمەۋگە تىرىسامىن. مەسسي، رونالدۋ، پەلە، مارادوننا سياقتى فۋبولشىلاردىڭ دەڭگەيىنە جەتۋدى جۇرتتىڭ ءبارى ارماندايدى. ال مەن ەركەبۇلان بولىپ قالۋعا ارەكەت ەتەمىن. مەن كاسىپقوي فۋتبولعا ەندى عانا كەلدىم. ۇلكەن جەتىستىكتەرگە جەتۋ ءۇشىن كوپ جۇمىس ىستەۋىم قاجەت» ، - دەيدى فۋتبولشى.

جامبىل مەكتەبى سەيىلدا بايشاقوۆ، ۆاحيد ماسۋدوۆ، ۆايت تالعايەۆ، انتون شوح، ەۆگەني ياروۆەنكو سىندى تانىمال فۋتبولشىلاردى بەرگەن. سولاردىڭ ءبىرى باۋىرجان يسلامحاندى ەركەبۇلان كۋميرىم دەپ بىلەدى.

ايتا كەتەيىك، ە. سەيداحمەت 2017 -جىلى الەم فۋتبولىندا جارقىراپ شىقتى. قازاقستاننىڭ جاسوسپىرىمدەر قۇراماسى ساپىندا 2017 -جىلعى گراناتكين مەموريالىنىڭ «ۇزدىك شابۋىلشىسى» اتاندى.

17 جاستاعى ەركەبۇلان رەسەيلىك «زەنيت» كلۋبىنىڭ جاستار كومانداسىنا قوسىلىپ، يتالياداعى بەدەلدى «Viareggio Cup» تۋرنيرىندە «اتلەتيك يۋنيون» قاقپاسىنا ءبىر تايمدا ءتورت گول سوعىپ، كوزگە ءتۇستى. جاسى جەتپەگەندىكتەن، «زەنيتتىڭ» نەگىزگى كومانداسىنا اۋىسا الماعان ەركەبۇلان «تاراز» فك ساپىندا قازاقستان پرەمەر- ليگاسىندا وتكىزگەن 15 ويىندا ءبىر گول سوعىپ، ءبىر ناتيجەلى پاس بەردى.

ۇلتتىق قۇراماعا باس باپكەر بولىپ كەلگەن ستانيمير ستويلوۆ جاستارعا سەنىم ءبىلدىردى. بۋداپەشتە ۆەنگرياعا قارسى وتكەن جولداستىق كەزدەسۋدە ەركەبۇلان جارقىن ويىنى جانە گولىمەن تاعى دا كوزگە ءتۇستى.

اقپاندا 18 گە تولعان سەيداحمەت «ۋفامەن» ۇزاق مەرزىمدى كەلىسىمشارتقا قول قويىپ، «انجيگە» قارسى دەبيۋت ويىنىندا (3:2) كومانداسى سوققان گولداردىڭ بارلىعىنا ءوز ۇلەسىن قوستى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى