ەلباسى «قاشاعاننىڭ» العاشقى مۇنايىن ماڭدايىنا جاققان بالا: سول ءسات بولاشاعىمدى ايقىندادى

«جاس وتان» جاستار قاناتىنىڭ كەزەكتى IV سەزىنىڭ قورىتىندى كۇنىندە ۇيىمداستىرىلعان «جاڭا الەمگە جول سالامىز» اتتى گالا- فورۋمدا بەرىك ۋاپ ءسوز سويلەپ، 18 جىل بۇرىنعى ءسات ءوزىنىڭ بولاشاعىن ايقىنداپ بەرگەنىن ايتتى، دەپ حابارلايدى «قازاقپارات» ح ا ا ءتىلشىسى.

«مەن، ۋاپ بەرىك سارسەنباي ۇلى ەلىمىزدەگى عاسىردان استام تاريحى بار مۇناي- گاز سالاسىنىڭ جاس وكىلىمىن. مەنىڭ تاعدىرىم وسى ءبۇلدىرشىن كەزىمنەن باستاپ مۇناي سالاسىمەن تىعىز بايلانىستى. سەبەبى، وسىدان 18 جىل بۇرىن «قاشاعان» مۇناي كەن ورنىنىڭ العاشقى مۇنايىن ەلباسىمىز نۇرسۇلتان ءابىش ۇلى «قازاقستاننىڭ بولاشاعى ءۇشىن» دەپ، مەنىڭ ماڭدايىما جاققان بولاتىن. سول ءسات مەنىڭ بولاشاعىمدى ايقىنداپ بەردى دەسەم دە بولادى»، - دەيدى جاس جىگىت.

ول سول كەزدە مۇناي- گاز سالاسىنىڭ بىلگىر مامانى بولۋ باعىتىنداعى العاشقى ارمانى پايدا بولعانىن ايتادى.

«پرەزيدەنتىمىز ەلىمىزدىڭ قازبا بايلىقتارىن زاماناۋي تەحنولوگيالارمەن يگەرىپ، الەمدە تەرەزەسى تەڭ قاتىناس جاساۋ ءۇشىن ءاربىرىمىز تەرەڭ بىلىمگە ۇمتىلۋىمىز كەرەكتىگىن ايتىپ جۇرەدى. مەن دە ءوز ارمانىمنىڭ كىلتى وسى تەرەڭ بىلىمدە ەكەنىن ءتۇسىندىم. سول سەبەپتى، 2010 -جىلى اتىراۋ قالاسىنداعى دارىندى بالالارعا ارنالعان مەكتەپ- ليتسەيىن ۇزدىك ءبىتىرىپ، قيالىما قانات ءبىتىپ، ۇلى بريتانيا ەلىندەگى مانچەستەر ۋنيۆەرسيتەتىنىڭ وقۋ گرانتىنا يە بولدىم. ءوز جەرىمنەن شەتتە جۇرگەن جىلدارى قازاقستاندىق جاستاردىڭ باسىن بىرىكتىرۋ ماقساتىندا ستۋدەنتتىك ۇيىمنىڭ قاتارىنا ەنىپ، كەيىن سول ۇيىمدا جەتەكشى اتاندىم. ودان كەيىنگى جىلدارى ءبىلىمىمدى ودان ارى جەتىلدىرۋ ماقساتىندا ۇلى بريتانيانىڭ ەڭ ۇزدىك ۋنيۆەرسيتەتتەرىنىڭ ءبىرى Heriot-Watt-تا وقىپ، مۇناي- گازىنىڭ ماگيسترى اتاندىم»، - دەيدى ول.

بەرىك ۋاپ قازىرگى تاڭدا سول «قاشاعان» كەن ورنىن يگەرەتىن كومپانيادا جاس مامان بولىپ جۇمىس اتقاراتىنىن جەتكىزدى.

«كەي كەزدەرى ءوز تاعدىرىمدى ەل تاعدىرىمەن ۇشتاستىرامىن. سەبەبى، تاۋەلسىز قازاقستانىمىزدىڭ قالىپتاسۋىنا جانە وركەندەپ دامۋىنا ەلباسىمىز زور ۇلەس قوستى. ءبىز دە سولاي ەڭبەك ەتۋىمىز كەرەك. بۇل تۋرالى وي مەن ءۇشىن وتكەن جىلى عانا جارىق كورگەن «تاۋەلسىزدىك ءداۋىرى» اتتى كىتابىن وقۋ بارىسىندا كەلدى. بۇل كىتاپ - تاۋەلسىزدىكتەن كەيىنگى قيىن- قىستاۋ زاماننان باستاپ قازىرگى ءبىز كورىپ وتىرعان قازىرگى قازاقستاننىڭ ءاربىر كەزەڭىن تولىقتاي سارالاعان ەلىمىزدىڭ ءبىر شەجىرەسى»، - دەدى ول.

بەرىك ۋاپ ەگەر ءاربىر جاس بۋىن بىلىمگە دەگەن قۇشتارلىعىن ەسەلەي بەرسە، ەلىمىز الەمدىك قاۋىمداستىقتا قادامىن نىق باسقان مەملەكەت بولىپ العا جىلجي بەرەتىنىنە سەنەتىنىن ءبىلدىردى.

«جاس وتاندىق دوستارىما «تاۋەلسىزدىك ءداۋىرى» كىتابىن وقۋعا كەڭەس بەرەر ەدىم. وقىساڭىز، بىلىمگە دەگەن قۇشتارلىعىڭىز ارتا تۇسەدى. ءسوزىمدى قورىتىندىلاي كەلە، ەلباسىمىز ايتقانداي «بۇگىنگىنىڭ ادامى ءبىلىمى جەتىك، جاڭا تەحنولوگيالاردى مەڭگەرگەن، جان- جاقتى بولۋى كەرەك». سونداي تۇلعا بولىپ قالىپتاسۋىمىزعا بۇگىنگى تاڭدا بارلىق جاعداي جاسالىپ جاتىر»، - دەپ ءتۇيدى بەرىك ۋاپ.

فوتو: قانات ەلەۋوۆ پەن بەرىك ۋاپ مۇراعاتىنان

اۆتور: ايان بەكەن ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى