يليا يلين ۇلكەن سپورتقا ورالادى

«ءمىنسىز فيزيكالىق فورماعا شامامەن %40 جاقىنمىن. ويتكەنى اۋىر اتلەتيكامەن مەن ون كۇن بۇرىن عانا اينالىسا باستادىم. ءبىراق بۇعان دەيىن جۇگىرىپ، سۋعا شومىلىپ، فۋتبول ويناپ جالپى سپورتتىق دايىندىقتى نازاردان تىس قالدىرمادىم. 32 جاسقا دەيىن اۋىر اتلەتيكامەن اينالىسقىم كەلگەندىگى تۋرالى بۇرىنان جوسپارىم بولعان»، - دەدى يليا يلين Kazakh TV Youtube-ارناسىنا بەرگەن سۇحباتىندا.

سپورتشى توكيا وليمپياداسىندا توپ جارۋ باياعىدان بەرگى ارمانى ەكەندىگىن ايتتى.

«ارينە، مەن ءتورت دۇركىن وليمپيادا چەمپيونى بولۋدى ارماندايمىن. بىرىنشىدەن، مەن قازىر ون جىل بۇرىن جوسپارلاعان جوسپارمەن ءجۇرىپ كەلەمىن. ەكىنشىدەن، مەن بۇل سپورتتى جاقسى كورەمىن. ءوز ءىسىمدى ساپالى ءارى ادەمى كورسەتە الامىن. ونىڭ ۇستىنە مەن ءالى جاسپىن. 29 جاس - بۇل سپورتشىنىڭ «شىڭى». سەبەبى مەندە اقىلمەن سارالاۋ، شەبەرلىك پەن تاجىريبە، جالپى دايىندىق جەتكىلىكتى»، - دەدى سپورتشى ءوزىنىڭ سۇحباتىندا.

ەسكە سالا كەتسەك، يليا يليننىڭ سىناماسىنان دوپينگ تابىلىپ، 2008 جانە 2012-جىلدارى وتكەن وليمپيادا ويىندارىنىڭ التىن جۇلدەلەرىنەن ايىرىلعان ەدى. IWF حابارلاۋىنا قاراعاندا، قازاقستاندىق سپورتشىنى ديسكۆاليفيكاتسيالاۋ مەرزىمى 2018-جىلدىڭ 19- قازانىندا اياقتالادى.

بۇعان دەيىن سپورتتان شەتتەتۋ مەرزىمى 2016-جىلدىڭ 10- ماۋسىمىندا باستالعاندىعى تۋرالى حابارلاعان بولاتىنبىز.

سونداي-اق، قازاقپارات ءتىلشىسى يليا يلين 2020-جىلعى وليمپياداعا قاتىسۋى مۇمكىن ەكەندىگى تۋرالى دا جازعان ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى