پارلامەنت دەپۋتاتتارى قازاقستاننىڭ شالعايداعى اۋىلدارىن ارالايدى
«بۇگىن دەپۋتاتتىق كورپۋس سايلاۋشىلارمەن كەزدەسۋ ءۇشىن ايماقتارعا شىعاتىن بولادى. ءبىزدىڭ ەڭ نەگىزگى ماقساتىمىز - پرەزيدەنتتىڭ بەس الەۋمەتتىك باستاماسىن جانە ونىڭ ەرەكشە مۇمكىندىكتەرىن ءاربىر ازاماتقا، ءار وتباسىنا جەتكىزۋ. سونىمەن بىرگە، زاڭ جاعىنان قامتاماسىز ەتۋ جۇمىستارىمىزدى جان- جاقتى ءتۇسىندىرۋ ىسكە اسىرىلادى»، - دەدى نۇرلان نىعماتۋلين ءماجىلىستىڭ جالپى وتىرىسىندا.
بەلگىلى بولعانداي، 6 - ساۋىرگە دەيىنگى ارالىقتا دەپۋتاتتار وڭىرلەردە بولادى.
ءماجىلىس ءتوراعاسىنىڭ سوزىنە قاراعاندا، حالىق قالاۋلىلارى كەزدەسۋلەردى وبلىس ورتالىقتارى مەن ءىرى قالالاردان بولەك، شالعايداعى اۋىلداردا، ەلدى مەكەندەردە دە وتكىزەدى.
«وڭىرلەردەن ورالعاننان كەيىن، ءبىز الەۋمەتتىك باستامالاردى جۇزەگە اسىرۋعا باعىتتالعان زاڭ جوبالارىمەن جۇمىستى باستايمىز. وسى ورايدا اتقارىلاتىن شارالار اۋقىمدى بولادى»، - دەدى ول.
اۆتور: رۋسلان عابباسوۆ
