ەڭ الىنۋى قيىن قامال - ادامنىڭ باس سۇيەگى
ءبىر ۋاق ادامگەرشىلىككە قاتىستى دانالاردىڭ سوزدەرىن وقىپ، بويىمىزداعى وسى قاسيەتتىڭ قانشالىقتى دارەجەدە دامىعان- دامىماعانىن باعامدايىق. نازارلارىڭىزعا مىرزاگەلدى كەمەلدىڭ «ابزالدىق الىپپەسى» كىتابىنان ادامگەرشىلىكككە قاتىستى توپتامانى ۇسىنامىز.
ادامگەرشىلىك
ناعىز ادام جەر بەتىندە ءوزىن قارىز ادامداي سەزىنەدى، ايتپەسە ول ماسىل رەتىندە سەزىنۋى ءتيىس ەدى.
ادامعا ادام بولۋ، ويلاي ءبىلۋ، تىڭداي ءبىلۋ - وسى ءۇش قابىلەت كەرەك.
ءوزى ءۇشىن عانا ءومىر ءسۇرىپ، وزىنە عانا پايدا بولسىن دەگەن ادام باقىتتى بولا المايدى. «ءوزىڭ ءۇشىن ءومىر سۇرگىڭ كەلسە، بىرەۋلەر ءۇشىن ءومىر ءسۇر»، - دەپتى سەنەكا.
ادام اعىن سۋ ەمەس. اعىن سۋ ارتىنا قاراي المايدى. ارتىڭا قارا، ءىزىڭ قانداي بولىپ ءتۇسىپتى، ءۇڭىل. ادامدى ءوزىنىڭ ارتىقشىلىقتارىن كورسەتۋ، باسىمدىلىق كورسەتۋ، جەڭىسكە قول جەتكىزۋ مۇمكىندىكتەرىن يەلەنۋ تىلەگى باسقارادى.
«ادامداردىڭ مىنەز- قۇلقى قاجەتتىلىگىنە بايلانىستى ءوربيدى» ، - دەدى بىزگە زاڭ تاريحىنان ساباق بەرگەن ديۋكوۆ دەگەن زاڭگەر.
«ادامدا الدىمەن ءوزىنىڭ قاجەتتىلىكتەرىنىڭ توڭىرەگىندە عانا قىزىعۋ بولادى، ءوزىنىڭ اۋىرعان ءتىسىنىڭ ۋايىمى ەلدەگى اشتىق پەن اپاتتان زارلىرەك» ، - دەپ د. كارنەگي دۇرىس ايتقان.
ادام قانداي بولسا، ءسوزى سونداي. «ادامدى دوسىنا قاراپ تانى» ، - دەگەن ءسوز بار. ءبىراق ادامنىڭ دوسىنا عانا قاراپ ەمەس، جاۋىنا قاراپ تا كىم ەكەنىن تانۋعا بولادى.
ۇلكەن ىستەردە ادامدار ءوزىن سول ىسكە لايىقتاپ ۇستاۋعا تىرىسادى، ال ۇساق ىستەردە ادامنىڭ شىن بەت پەردەسى انىقتالادى.
وي قۋۋ بار، ءىس قۋۋ بار، ءسوز قۋۋ بار. ءمىنىڭ جوق بولىپ كورىنۋگە تىرىسپا، كەمشىلىگى جوق ادامنىڭ ارتىقشىلىعى دا جوق. تاعدىر دەگەنىمىز - ادامنىڭ ءوزىنىڭ ومىرىندەگى جىبەرىپ العان كەمشىلىكتەرىنىڭ جيىنتىعى.
"ىستىق پەشكە ءبىر وتىرىپ قويعان مىسىق قايتىپ ىستىق پەشكە وتىرمايدى. سۋىق پەشكە دە"، - دەگەن مارك تۆەن. قاتەلىكتەردى بولدىرماۋ دا ءبىزدىڭ تاجىريبەمىزگە، بىلىمىمىزگە، سانامىزعا بايلانىستى.
ادام ادال بولعان سايىن وزگە جۇرتتىڭ ادالدىعىنا كۇماندانۋى ازايادى. «ادام نەعۇرلىم اقىلدى، مەيىرىمدى بولعان سايىن، سوعۇرلىم وزگەنىڭ جاقسىلىعىن باعالاعىش كەلەدى» ، - دەپتى بلەز پاسكال.
«تاربيەلى ادامدار ادامنىڭ جەكە باسىن ارداقتاي بىلەدى، سوندىقتان دا ول ءارۋاقىتتا مەيىربان، جايدارى، سىپايى كەلەدى» ، - دەيدى چەحوۆ.
ادال ادام ادالدىعى ءۇشىن تولەم تولەپ تۇرادى.
اركىم ارنارسەنىڭ قۇلى. قۇل ەمەس ەشكىم جوق. ءبارى ۇعۋعا بايلانىستى.
«بارلىعىن ايقىن كورىپ تۇرعان ادام باقىتسىز» ، - دەپتى پاستەر. "ءوزىنىڭ سەنىمىنە قاراي ءىس جاساعان ادامنىڭ ءبارى پاراساتتى ەمەس، ول ءۇشىن ونىڭ سەنىمى دە پاراساتتى بولۋى كەرەك"، - دەيدى دوستويەۆسكي.
"ەسى بار ادام ومىرگە يكەمدەلەدى، ەسسىز ادام ءومىردى وزىنە يكەمدەگىسى كەلەدى"، - دەيدى بەرنارد شوۋ، - قوعامنىڭ دامۋى بايسالدى اقىلدىلاردان گورى شىدامسىز ىزدەنۋشىلەرگە كوبىرەك بايلانىستى".
نەگە ءبىز بىرەۋ ماقتاسا: "مىنە مەن قاندايمىن!"، - دەپ، ال ۇرىسسا: "ول قانداي، ءا؟ "، - دەپ ويلايمىز.
ءتۇسىنۋ دەگەنىمىز - سەزىنۋ. ءتۇسىنۋ دەگەنىمىز - كەلىسۋ. ءبىر نارسەنى شىنداپ ءتۇسىنۋ ءۇشىن ونى ىستەپ كورۋ كەرەك.
"ءسىز مەنى تۇسىنبەدىڭىز"، - دەگەننەن گورى، "مەن سىزگە جەتكىزە المادىم- اۋ"، - دەسەڭ ۇتاسىڭ.
قولىنان ءىس كەلەتىندەردى كورە الماۋ، دارىندىلارعا زيان جاساۋ، ۇلىلارعا وشپەندىلىك جاساۋ بۇرىننان كەلە جاتقان نارسە. ادام ادامدى وزىنە ۇقساستىقتارى ءۇشىن دە جاقسى كورۋى مۇمكىن "جەك كورسە جاقسى كورىپ، جالعاندىقتى - شىندىقپەن، زورلىقتى - شىداۋمەن جەڭۋ مۇمكىن"، - دەگەن ماحاتما گاندي.
ەگەر ومىردە كوپ نارسەدەن قۇر قالساڭ، وعان ءوزىڭدى عانا ايىپتا. كىسىنى كولەڭكەسى جەتەلەمەيدى، كىسى كولەڭكەسىن جەتەلەيدى.
"ەڭ الىنۋى قيىن قامال - ادامنىڭ باس سۇيەگى"، - دەپتى ماركس.
تۇسىنىكسىز بولعان جامان. ءبىراق ابدەن تۇسىنىكتى بولساڭ ول دا جامان. مەنى تۇسىنبەي قالادى دەپ قورىقپا، ونى تۇسىنبەي قالامىن با دەپ قورىق. ماعان تۇسىنىكتى نارسە جۇرتتىڭ بارىنە تۇسىنىكتى دەپ ويلاپ قالما. بىرەۋ ءسوزىڭدى تۇسىنبەي قالسا كۇلمە. قانشا تۇسىندىرسەڭ دە ۇقپايتىن، مۇمكىندىگى شەكتەۋلى ادامدار بولادى.
جانىڭ جالقاۋ بولماسىن. "پەندەدە ءبىر ءىس بار - جالىعۋ دەگەن. ول - تاعدىردا اداممەن بىرگە جاراتىلعان: ونى ءوزى تاپقان ەمەس. وعان ەگەر ءبىر ىلىكسە - ادام بالاسى قۇتىلماعى قيىن"، - دەپتى اباي ادام ومىرىندە اتاققا، بيلىككە، بايلىققا، بىلىمگە، ابىرويعا ۇمتىلادى. ۇستاي بىلمەسەڭ، ءبارى دە بايانسىز.
Massaget.kz
