موڭعوليا پرەزيدەنتى جەكەي قاليدولدا ۇلىن گەنەرال شەنىنەن ايىردى

موڭعوليا پرەزيدەنتىنىڭ جارلىعى كونستيتۋتسيانىڭ 34-بابىنىڭ 1-تارماقشاسى، «موڭعوليا پرەزيدەنتى تۋرالى» زاڭنىڭ 9-بابىنىڭ 1- تارماقشاسىنا، «اسكەري قىزمەت تۋرالى» زاڭنىڭ 28-بابىنىڭ 28.2-بولىمىنە، «موڭعوليا ازاماتتىعىنان شىعارۋ تۋرالى» 2018 -جىلعى 27 - ناۋرىزداعى №32 جارلىعىنا نەگىزدەلگەن.

وسى جارلىقتا: «موڭعول ەلىنىڭ ازاماتتىعىنان شىققان، جەكەي قاليدولدا ۇلىنا بەرىلگەن جوعارعى وفيسەرلىك «بريگادا گەنەرالى» شەنىنىڭ كۇشى جويىلسىن» ، - دەلىنگەن.

جەكەي قاليدولدا ۇلى 1959 -جىلى موڭعوليانىڭ التانتسوگتس اۋىلىندا دۇنيەگە كەلگەن - ۇلتى قازاق، بريگادا گەنەرالى (2007) . ول 1983 -جىلى سۇحەبااتار اتىنداعى اسكەري جوعارى وقۋ ورنىن، 1990 -جىلى ماسكەۋ قالاسى شەكارا اسكەري ماماندىق جەتىلدىرۋ كۋرسىن، 1997 -جىلى ماسكەۋ قالاسى شەكارالىق اسكەري باسقارۋ اكادەمياسىن بىتىرگەن. 1983 -جىلى موڭعوليانىڭ باتىس شەكاراسى «بۇلعىن» جاساعىنا قىزمەتكە تاعايىندالادى. اسكەري قىزمەتىن ۆزۆود كومانديرلىگىنەن باستاپ، ونشاقتى جىل ارالىعىندا كوشپەلى توپ جەتەكشىسى، شتابتىڭ دايىندىق ءبولىمىنىڭ باستىعى، جاساق كومانديرى بولىپ، 2000 -جىلى اسكەري عىلىم سالاسىندا دوكتورلىق ديسسەرتاتسياسىن قورعايدى. ول بايان- ولگەي ايماعىنان ەكى رەت موڭعوليا مەملەكەتىنىڭ ۇلى حۋرالىنا (پارلامەنت - اۆت. ) دەپۋتات بولىپ سايلانعان.

جەكەي قاليدولدا ۇلى موڭعوليانىڭ جوعارى ناگرادالارى «التىن جۇلدىز» ، «مايدان داڭقى» وردەن- مەدالدارىمەن ماراپاتتالعان. وعان 2007 -جىلدىڭ 27 - شىلدەسىندە موڭعوليا پرەزيدەنتىنىڭ جارلىعىمەن بريگادا گەنەرالى اتاعى بەرىلگەن بولاتىن.

ايتا كەتەرلىگى، جەكەي قاليدوللا ۇلى 2012 -جىلى قازاقستانعا قونىس اۋداردى. موڭعوليا بۇقارالىق اقپارات قۇرالدارىندا وعان قارسى «مەملەكەتتىك قۇپيانى ساتتى، تىڭشىلىق جاسادى» دەگەن ماعىنادا ماقالالار دا جازىلا باستاعان بولاتىن. ال پرەزيدەنتتىڭ جارلىعىندا «گەنەرال شەنىنەن ايىرۋ موڭعوليا ازاماتتىعىنان شىعۋىنا بايلانىستى» دەپ كورسەتىلگەن.

جەكەي قاليدولدا ۇلى موڭعوليا قازاقتارى اراسىنان شىققان ءۇشىنشى گەنەرال ەدى. مۇنان بۇرىن دالەلحان سۇگىربايەۆ، زايسان ءمۇدىرىس ۇلى موڭعوليا ەلىنىڭ گەنەرال شەنىن العان بولاتىن.

ەستەرىڭىزگە سالا كەتەيىك، اسكەري قىزمەت تۋرالى زاڭنىڭ 28-بابىنىڭ 28.2- تارماعى بويىنشا قىلمىس جاساعان نەمەسە سوتتالعان جانە ازاماتتىقتان شىققان موڭعول ازاماتتارىنىڭ اسكەري اتاقتارىن شەن بەرۋشى لاۋازىم يەسىنىڭ شەشىمى بويىنشا قايتارىپ الىنادى.

اۆتور: قۋات ۋاتحان

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى