اينۇر تۇرسىنبايەۆا قايرات نۇرتاستان قالاي جەڭىلگەنىن ايتىپ بەردى
ول حالىقتىڭ سۇيىسپەنشىلىگىنە بولەنگەن ءانشىنى ءبىر كەزدەرى مەنسىنبەي پروديۋسەرى گۇلزيرا ايداربەكوۆانى رەنجىتىپ العان.
بۇل تۋرالى ول جەلىدەگى پاراقشاسىندا جازدى، دەپ حابارلايدى Stan.kz.
اڭگىمەسىن مىنەزى تۋرالى ايتىپ باستاعان تۇرسىنبايەۆا الماتىداعى كونكۋرستاردىڭ بىرىندە انشىگە باس سالعانىن ەسىنە الدى.
وسىدان 10 شاقتى جىل بۇرىن الماتىعا ءبىر كونكۋرسقا قازىلىق ەتۋگە شاقىردى... بارسام قاپتاعان ءانشى.. ءبىر قۇربىمدى كورىپ قالىپ ەم، «قايرات نۇرتاسپەن جارىسقا تۇسەم» دەدى، «دايىنسىڭ با؟» دەگەن ەم، «جوق، ونى ءالى كورگەن دە جوقپىن» دەدى. ادەتتەگىدەي كوتەرىلىپ كەتتىم، «نەگە ول ساعان جولىقپايدى، نەگە سالەم بەرمەيدى، ول كىم سونشاما» دەپ بۇرقىلداپ الا جونەلدىم»، - دەپ جازدى ول.
ونىڭ ايتۋىنشا، اينۇر قايراتتىڭ كۇن سايىن كونسەرت بەرەتىنى، بۇكىل قازاقستاندى ارالاپ جۇرگەنىنەن بەيحابار ەكەن.
«سونىمەن جارىس باستالدى، مەن بىردەن قايراتتى باس سالدىم... « قايرات نۇرتاس دەگەن كىم» دەپ باستادىم اڭگىمەنى... «پروديۋسەرى قايدا قاراپ ءجۇر» دەپ ءبىر ءتيىستىم. سونىمەن نە كەرەك ايقاي شىقتى»، - دەيدى تۇرسىنبايەۆا.
وسىدان كەيىن قايراتتىڭ اناسى ءارى پروديۋسەرى ايداربەكوۆا سۇحباتتارىندا تۇرسىنبايەۆاعا رەنجىگەنىن ايتقان.
ايتىسكەر اقىن قايراتتان العاش رەت قاشان جەڭىلگەنىن دە جازعان.
«ءبىر كۇنى ءبىر تويدا قۇرمەتتى قوناقتاردىڭ اراسىندا «گۇل» بولىپ وتىرعان ەدىم، قاسىمداعىلار تۋرا سول وقيعانى ايتىپ، «نە بولدى، تاتۋلاستىڭىزدار ما؟!» دەپ سۇراپ جاتىر. «ە، جوعا» دەپ مەن قاتايىپ وتىرعانمىن، ءبىر كەزدە تويدىڭ تورىنە قايرات كىرىپ كەلدى. كىرىپ كەلدى دە ماعان قاراي جۇگىرىپ كەلىپ، «قالايسىز اپكە» دەپ بەتىمنەن ءسۇيىپ امانداسسىن. اشىق جارقىن، ءماز مەيرام. ۇيالعانىمنان جەردىڭ تەسىگىن ىزدەپ كەتتىم. 1-0 بولىپ وڭباي جەڭىلگەنىمدى سوندا سەزىندىم...»، - دەپ جازعان ول.
قايرات نۇرتاس ونى جۇرگەن جەرىندە ماقتاپ جۇرەدى ەكەن.
«تاعى بىردە مۇقتار نيازوۆتى كورىپ قالىپ اڭگىمەلەسىپ وتىرسام «وسى ءسىز قايراتپەن جاقسى ارالاسىپ تۇراسىز با؟!» دەپ سۇرادى. «مۇلدە ارالاسپايمىن» دەسەم، «قايدام ءسىزدى كەرەمەت ماقتاپ، مىقتى اقىن، قاتتى قۇرمەتتەيمىن» دەپ ماداقتاپ وتىرعانىن ەستىپ قالدىم دەيدى، 2-0، - دەپ اينۇر جەڭىلگەنىن مويىندادى.
ول قايراتقا قارسى شىعۋ حالىققا قارسى شىققانمەن بىردەي ەكەنىن بىلگەن.
«بىلتىر استانادا قايراتتىڭ ۇلكەن كونسەرتى ءوتتى. قايرات ءوز قولىمەن VIP بيلەتتى اكەلىپ، «ءسىز كەلسەڭىز قاتتى قۋانىپ قالامىن اپكە» دەگەن كەزدە 3-0 بولىپ ءبىرجولا نوكاۋت الدىم عوي. قازىر ويلاپ قاراسام تيتتەي بالا كەزىنەن مەنەن دە اقىلدى ەكەنىن كورسەتىپ كەلەدى ەكەن. اتا-اناسىمەن جاقىن ارالاسا كەلە تاربيەنىڭ ءتۇبى اكەنىڭ قانىنان، شەشەنىڭ سۇتىنەن ەكەنىن ءبىلدىم. وتباسىمەن قويعان كونسەرتكە بارىپ تاعى ءسۇيسىنىپ قايتتىم.»، - دەپ اياقتاعان.
