زاڭ كومەگىنىڭ ورتاشا قۇنىن ءبىلۋ ءۇشىن تاريفتىك كەستە ەنگىزىلەدى

بۇل تۋرالى پارلامەنت ءماجىلىسىنىڭ جالپى وتىرىسىندا زاڭ جوباسىن تالقىلاۋ كەزىندە ادىلەت ءمينيسترى مارات بەكەتايەۆ ءمالىم ەتتى، دەپ حابارلايدى قازاقپارات.

جالپى وتىرىستا پالاتا دەپۋتاتتارى زاڭ جوباسىنداعى جاڭاشىلدىقتارعا قولداۋ ءبىلدىرىپ، «ادۆوكاتتىق قىزمەت جانە زاڭ كومەگى تۋرالى» زاڭ جوباسىن ءبىرىنشى وقىلىمدا ماقۇلدادى.

«زاڭگەرلىك كومەكتىڭ قۇنى تۋرالى اشىق اقپاراتتىڭ جوقتىعى باعانىڭ نەگىزسىز كوتەرىلۋىنە سەبەپ بولىپ وتىر. وسى ورايدا حالىقتىڭ حاباردار بولۋىن جانە ءادىل باعانىڭ بەلگىلەنۋىن قامتاماسىز ەتۋ ماقساتىندا ادۆوكاتتار مەن زاڭ كونسۋلتانتتارى كورسەتەتىن كومەكتىڭ ۇسىنىمدىق سيپاتتا تاريفتىك كەستەسىن ازىرلەۋ قاراستىرىلادى. بۇل گەرمانيا، فرانسيا، ا ق ش، پولشا، چەحيا جانە باسقا ەلدەردىڭ تاجىريبەسى.

تاريفتىك كەستەنى ەنگىزۋ ازاماتتارعا زاڭ كومەگىنىڭ ورتاشا قۇنىن بىلۋگە جانە وعان ارتىق شىعىندى تولەمەۋگە مۇمكىندىك بەرەدى»، - دەپ اتاپ ءوتتى مينيستر.

بۇدان بولەك م. بەكەتايەۆ بۇگىندە ازاماتتاردى تەرىس پيعىلدى ادۆوكاتتار مەن زاڭ كونسۋلتانتتارىنان قورعاۋ تەتىگى قاراستىرىلماعانىن ءسوز ەتتى.

«ادۆوكاتتار مەن زاڭ كونسۋلتانتتارى ءوز قىزمەتىن جۇزەگە اسىرۋ بارىسىندا سەنىم بىلدىرۋشىگە ەلەۋلى مۇلىكتىك زالال كەلتىرۋى مۇمكىن. وسى ورايدا، ادۆوكاتتاردىڭ، زاڭ كونسۋلتانتتارىنىڭ مىندەتتى تۇردە ءوز كاسىبي جاۋاپكەرشىلىگىن ساقتاندىرۋ ەنگىزىلەدى. بۇل سەنىم بىلدىرۋشىلەرگە كاسىبي زاڭ كومەگىن الۋعا كەپىلدىك بەرەدى. ساقتاندىرۋ ينستيتۋتى 2020 -جىلدان باستاپ ەنگىزىلەدى»، - دەدى ۆەدومستۆو باسشىسى.

سونىمەن قاتار ادىلەت ءمينيسترى ادۆوكاتۋرادا جاڭا تەحنولوگيالاردى پايدالانۋ دامىماعانىن ءسوز ەتتى. بۇل ماسەلەنىڭ شەشىمى رەتىندە «ە- ادۆوكاتۋرا» اقپاراتتىق جۇيەسىن قۇرۋ مەن قالىپتاستىرۋ ەسكەرىلگەن.

فوتو: newshub.co.nz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى