حالىقتىڭ الەۋمەتتىك ءالسىز توپتارىنا ادۆوكاتتار تەگىن زاڭ كومەگىن كورسەتەدى
بۇل تۋرالى پارلامەنت ءماجىلىسىنىڭ جالپى وتىرىسىندا «ادۆوكاتتىق قىزمەت جانە زاڭ كومەگى تۋرالى» زاڭ جوباسىن تالقىلاۋ كەزىندە ادىلەت ءمينيسترى مارات بەكەتايەۆ ءمالىم ەتتى، دەپ حابارلايدى قازاقپارات.
«زاڭ جوباسىمەن حالىقتىڭ الەۋمەتتىك ءالسىز توپتارىنا ادۆوكاتتارمەن جانە زاڭ كونسۋلتانتتارىمەن قۇقىقتىق جاعدايدىڭ باسىنان اياعىنا دەيىن تەگىن زاڭ كومەگىن كورسەتۋ قاراستىرىلعان. ول - pro bono دەپ اتالادى. وسىنداي قىزمەتتەردى كورسەتۋ تاراپتاردىڭ كەلىسۋىمەن ەرىكتى جانە وتەۋسىز نەگىزدە بولادى. ايتا كەتۋ قاجەت، pro bono قىزمەتى مىندەت ەمەس، ول قۇقىق بولىپ تابىلادى جانە ونى كورسەتۋ ءماجبۇرلى بولمايدى»، - دەپ ءتۇسىندىردى م. بەكەتايەۆ.
بۇگىنگى تاڭدا سوتتاردا ازاماتتىڭ مۇددەسىن زاڭدىق ءبىلىمى بار كەز كەلگەن ادام بىلدىرە الادى. الايدا وسىنداي كومەك ساپاسىز كورسەتىلگەن جاعدايدا ازاماتتار ءوز قۇقىقتارىن قورعاي المايدى.
«وسى ورايدا سوتتاردا وكىلدىك ەتەتىن جەكە تۇلعالاردىڭ زاڭ كونسۋلتانتتارى پالاتالارىنا مىندەتتى تۇردە مۇشەلىكتە بولۋى قاراستىرىلعان. جەكە تاجىريبەمەن اينالىساتىن زاڭگەرلەردىڭ ءوزىن- ءوزى باسقارۋ ۇيىمدارىنا مۇشەلىكتە بولۋى زاڭ كومەگىنىڭ ساپاسىن ارتتىرۋعا نەگىز بولادى»، - دەدى مينيستر.
تالقىلاۋدان كەيىن پالاتا دەپۋتاتتارى زاڭ جوباسىنداعى جاڭاشىلدىقتارعا قولداۋ ءبىلدىرىپ، «ادۆوكاتتىق قىزمەت جانە زاڭ كومەگى تۋرالى» زاڭ جوباسىن ءبىرىنشى وقىلىمدا ماقۇلدادى.
