قىتايلىقتار كەڭ جولاقتى ينتەرنەت ارقىلى ءبىر فيلمدى ەكى سەكۋندتا جۇكتەي الادى

ق ح ر- دىڭ قازاقستانداعى توتەنشە جانە وكىلەتتى ەلشىسى جاڭ حانحۋەيدىڭ ايتۋىنشا، بۇرىن قىتاي ەلەكتروندى چيپتەردى سىرتتان كوپتەپ ساتىپ الاتىن. ال وعان كەتكەن اقشا مۇنايعا جۇمسالعان قارجىدان دا كوپ بولدى. « قازىر ءبىز ول چيپتەردى ءوزىمىز شىعارىمىز. ساپاسى دا، تەحنولوگيالىق كورسەتكىشى دە جوعارى. مىسالى، Huawei كومپانياسى ۇيالى تەلەفونداردىڭ چيپتەرىن قۇراستىرادى. ول چيپتەردىڭ ءبىر كۆادرات سانتيمەترىندە 4,5 ميلليارد ترانزيستور بار. بۇل - اقىلعا سىيمايتىن نارسە. دەگەنمەن، اقپاراتتىق تەحنولوگيالاردىڭ قازىرگى دەڭگەيى سوعان جەتتى»، - دەيدى جاڭ حانحۋەي.

ەلشىنىڭ سوزىنە قاراعاندا، قىتايلىقتار كەڭ جولاقتى ينتەرنەتتىڭ ەڭ كۇشتى ۇلگىسىن ىسكە قوستى. بۇگىندە 5G جەلىسىن تارتۋ شارالارى اتقارىلىپ جاتىر. «مەن اتالعان جەلىنىڭ جىلدامدىعىن مىسالمەن كەلتىرەيىن. جاقىندا قىتايداعى ءبىر ستاديوندا وتكەن كونسەرت كەزىندە جاڭا جەلىنى سىناقتان وتكىزدى. شاراعا جينالعان 80 مىڭداي ادام كونسەرتتى سمارتفوندارعا ءتۇسىرىپ، تانىستارىنا جىبەردى. سوندا ءاربىر كورەرمەنگە سەكۋندتىنا 200 م ب بولاتىن ينتەرنەت تاراتىلدى. ونداي جىلدامدىقپەن ءبىر فيلمدى 2-5 سەكۋندتا جۇكتەۋگە بولادى. مۇنىڭ بارلىعى - جاڭا تەحنولوگيالار»، - دەپ اتاپ كورسەتتى جاڭ حانحۋەي.

 ايتا كەتەيىك، بۇگىن ەلشى جاڭ حانحۋەي جۋرناليستەرمەن كەزدەسىپ، ەكىجاقتى بايلانىستاردى دامىتۋ جايىندا ايتىپ بەردى. ونىڭ سوزىنە قاراعاندا، قىتايدىڭ قازاق حالقىنا دەگەن قىزىعۋشىلىعى ارتىپ كەلەدى. بۇدان بولەك، ەلشى قىتايداعى اقپاراتتىق تەحنولوگيالاردى دامىتۋ ماسەلەسىنە توقتالدى.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى