باتىس قازاقستان وبلىسىندا اۋارايىنىڭ جايسىزدىعىنان جيىرما كيىك شىعىنعا ۇشىرادى

باتىس قازاقستان وبلىسى  ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسىنىڭ باسشىسى قايرات قادەشيەۆتىڭ ايتۋىنشا، بۇلاردىڭ ءبارى دە - بىلتىرعى تولدەر. سونىڭ جەتەۋى اقجايىق جانە سونشاسى بوكەي ورداسى، قالعان التاۋى جاڭاقالا اۋدانىندا ولگەن.

اقجايىق اۋدانىندا 21-22 - ناۋرىز كۇندەرى جاڭبىر جاۋىپ، سوڭى مۇزداققا ۇلاستى. سونىڭ سالدارىنان اۋدان ورتالىعى چاپايەۆ اۋىلى ماڭىندا جۇرگەن كيىكتەر ءشوپ جەي الماي، قيىن جاعدايعا تاپ بولدى. اقجايىق اۋدانى اكىمدىگىمەن بىرلەسە وتىرىپ، تراكتورمەن كيىكتەر شوپكە جەتەتىندەي جاعداي جاسالدى.

 «ءشوپ سالىپ كورىپ ەدىك، كيىكتەر وعان جولامادى. سوسىن قامىسقا دەيىن جول سالىندى. قازىر كيىكتەر قامىستىڭ اراسىندا، جىلقىلارمەن بىرگە تەبىندەپ ءجۇر. جانۋارلاردى سول ماڭداعى قوس بىردەي اڭشىلىق شارۋاشىلىعى باقىلاۋدا. جالپى، وبلىستا 100 مىڭنىڭ ۇستىندە كيىك بار، ولاردىڭ نەگىزگى بولىگى قازىر قازتالوۆ، جاڭاقالا جانە بوكەي ورداسى اۋداندارىندا ءجۇر. كيىكتەر نەگىزىنەن سوردىڭ ىرگەسىندە جايىلعاندى جاقسى كورەدى. اقجايىقتا بولەك جۇرگەن ءبىر توبى عانا»، دەدى «قازاقپارات» تىلشىسىنە ق. قادەشيەۆ.

فوتو:zhaikpress.kz

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى