قازاقستان بايان- ولگەيدەن مال ساتىپ الماق نيەتتە

بۇل تۋرالى بايان- ولگەيدە وتكەن «بيزنەس فورۋم ولگەي - 2018» اتتى فورۋم بارىسىندا «ەت- ترانزيت» كومپانياسىنىڭ ديرەكتورى تالعات اۋكەتاي ۇلى ءمالىم ەتتى، دەپ حابارلايدى قازاقپارات ءتىلشىسى.

بايان- ولگەيلىك كاسىپكەردىڭ ايتۋىنشا، قازاقستاننىڭ جامبىل، سەمەي، وسكەمەن وبلىستارىنىڭ ءبىرقاتار كومپانيالارى ءتىرى مال ساتىپ الۋ تۋرالى ۇسىنىس جاساعان. بۇنداي ۇسىنىس قىرعىزستان كاسىپكەرلەرى تاراپىنان دا تۇسكەن. ولار اتالمىش جۇمىستى موڭعول ەلىنىڭ ءتيىستى زاڭنامالىق اكتىلەرى اياسىندا ۇيىمداستىرۋدى قولدايدى.

 «بيىلعى جىلى موڭعول ۇكىمەتى ەۋروپا ەلدەرىنە، ازياعا ونىڭ ىشىندە ۆەتنام، لاوس حالىقتىق دەموكراتيالىق رەسپۋبليكاسىنا، يران، بىرىككەن اراب امىرلىكتەرىنە ەكسپورتقا ەت شىعارۋعا كەلىسىمشارت جاساسقان. اتالمىش جوسپاردى جۇزەگە اسىرۋ بارىسىندا، بايان- ولگەي ايماعى باستى ماڭىزعا يە. سەبەبى، قازىرگى جاعدايمەن قاراعاندا، موڭعوليانىڭ باتىس ايماقتارى مالدىڭ جۇقپالى ىندەتتەرىنەن ادا. بۇل ءبىر جاعىنان وڭىردەگى از قازاقتىڭ تۇرمىس جاعدايىن جاقسارتا تۇسۋگە سەپ بولار ەدى»، - دەيدى تالعات اۋكەتاي ۇلى.

 ايتا كەتەرلىگى، موڭعوليادا شەت ەلدەرگە تىرىدەي مال شىعارۋ ءىسى زاڭمەن رەتتەلمەگەن. سونىمەن قاتار، موڭعوليا وسىدان ءۇش جىل بۇرىن قىتاي مەن رەسەيگە ەكسپورتقا تىرىدەي مال شىعارا باستاپ، كەيىننەن بۇعان حالىق قارسى شىققان. وعان سەبەپ، ەكسپورتقا شىققان جىلقى مالىنا قىتاي ازاماتتارىنىڭ جاساعان قياناتى ەدى. بۇل ارەكەت بەس تۇلىك مالىن قازىنا سانايتىن كوشپەندىلەردىڭ جيرەنىش سەزىمىن تۋعىزىپ، سول كەزدەگى ۆيتسە- پرەمەر مينيستر، قازىرگى ۇكىمەتباسشىسى ۋحنااگيين حۇرەلسۇح شەتەلدەرگە ەكسپورتقا تىرىدەي مال شىعارۋعا سانكسيا سالعان بولاتىن.

 ال تالعات اۋكەتاي ۇلى بولسا قىتاي مەن قازاق حالقىن سالىستىرۋعا كەلمەيتىنىن ايتىپ، ماسەلەنى زاڭ جۇزىندە رەتتەۋ قاجەتتىگىن العا تارتادى. «قازاقتار دا كوشپەندى ەل، مالمەن قالاي قاتىناسۋدى جانە مال قادىرىن بىلەدى. سوندىقتان ۇكىمەت اتالمىش شەشىمىن قازاقستانعا قارسى قولدانباسا دەپ ويلايمىز»، - دەيدى ول.

ايتا كەتەرلىگى، «ەت- ترانزيت» كومپانياسى 2005 -جىلدان بەرى ۇزدىكسىز قىزمەت جۇرگىزىپ كەلە جاتقان كومپانيا. تاۋىلىگىنە 140-150 ءىرى قارا، 400-500 ۇساق مال ەتىن دايىنداپ،  1000 تونناعا دەيىن ەت مۇزداتا الادى. 2018 -جىلدان باستاپ جىلقى، قوي ەتتەرىن قىرعىزستانعا شىعارا باستاعان.

ەسكە سالا كەتسەك، بيىلعى جىلى موڭعوليادا مال باسى 66 ميلليونعا جۋىقتاعان، سونىڭ ىشىندە بايان- ولگەيدە 2 ميلليوننان استام مال بار.

اۆتور: قۋات ۋاتحان

فوتو: spkpavlodar.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى