باقىتجان ساعىنتايەۆ وڭتۇستىكتە سۋ تاسقىنى ورىن الۋى مۇمكىن ەكەنىن ەسكەرتتى
بۇل تۋرالى ۇكىمەتتىڭ سەلەكتورلىق رەجىمدەگى وتىرىسىن اشقان پرەمەر-مينيستر باقىتجان ساعىنتايەۆ ايتتى، دەپ حابارلايدى قازاقپارات.
«وزدەرىڭىز كورىپ وتىرعانداي، اۋا رايى وتە قۇبىلمالى بولىپ وتىر. تەك قانا سوڭعى اپتانىڭ وزىندە استانا قالاسىندا، اقمولا، پاۆلودار، اقتوبە، قوستاناي جانە باسقا دا وبلىستاردا كۇن رايى كۇرت بۇزىلىپ، بىرنەشە رەت الدىن الا ەسكەرتۋ جاريالاندى. مالىمەتتەر بويىنشا الداعى كۇندەرى وڭتۇستىك قازاقستان مەن قىزىلوردا وبلىستارىندا دا جاڭبىر جاۋىپ، وزەندەر ارناسىنان اسۋى مۇمكىن. شىعىس قازاقستان وبلىسىندا دا جاۋىن-شاشىن بولادى دە كۇتىلۋدە. بۇگىنگى كۇنى شىعىستا جاڭبىر جانە تاۋدان اققان سۋ ەلدى مەكەندەردى باسىپ قالدى»، - دەدى ۇكىمەت باسشىسى.
وسى رەتتە باقىتجان ساعىنتايەۆ وڭىردەگى جاعداي بويىنشا جانە قابىلدانعان شارالار تۋرالى شىعىس قازاقستان وبلىسىنىڭ اكىمى دانيال احمەتوۆكە ءسوز بەردى.
احمەتوۆتىڭ ايتۋىنشا، شىعىستا بيىل تۇسكەن جاۋىن-شاشىن كولەمى تومەن بولعانىمەن جەر توڭى وتكەن جىلمەن سالىستىرعاندا 2 ەسە قالىڭ بولىپ وتىر. بۇعان قوسا، وزەندەردە قاتقان مۇزدىڭ قالىڭدىعى كەي جەرلەردەن 1 مەتردەن اسىپ جىعىلعان.
«ناۋرىزدىڭ 1 ىنەن 25 ىنە دەيىنگى ارالىقتا جاۋعان جاڭبىر قالىپتى نورمادان 3 ەسە ارتىق بولدى. بۇگىنگى كۇنگى جاعداي بويىنشا وبلىستا ۇيلەردى سۋ باسۋدىڭ 481 فاكتىسى تىركەلدى. قازىرگى كەزدە 175 ۇيدە ءالى سۋ بار. 628 ءۇي مەن 110 ساياجايدىڭ اۋلاسىنا سۋ كىردى. وسىعان وراي جوعارى دەڭگەيلى دايىندىق رەجىمى وسكەمەن جانە سەمەي قالاسىندا، جارما، زىريان، كۇرشىم، قاتونقاراعاي، ۇلان اۋداندارىندا ەنگىزىلدى. وبلىستىڭ ءۇش اۋدانىندا اياگوز، گلۋبوكوە، شەمونايحادا تابيعي سيپاتتاعى توتەنشە جاعداي جاريالاندى»، - دەدى وبلىس باسشىسى.
