قىزىلوردا وبلىسىندا ارال تەڭىزى كۇنى اتالىپ ءوتتى
ەستەرىڭىزگە سالا كەتسەك، 2017-جىلى وبلىس اكىمدىگى مەن حالىقارالىق ارالدى قۇتقارۋ قورىنىڭ ۇيىمداستىرۋىمەن وتكەن تۇراقتى دامۋ فورۋمىندا اتالمىش قور قۇرىلعان 26- ناۋرىزدى (2003) «ارال تەڭىزىنىڭ كۇنى» رەتىندە اتاپ ءوتۋ تۋرالى شەشىم قابىلدانعان بولاتىن.
ارال جانە قىزىلوردا قالالارىندا ەكولوگ عالىمدار، تەڭىزدى قۇتقارۋعا ۇلەس قوسقان مەملەكەت جانە قوعام قايراتكەرلەرىنىڭ قاتىسۋىمەن شارالار ءوتتى. بۇعان بۇرىنعى قاز ك س ر مەليوراتسيا جانە سۋ شارۋاشىلىعى ءمينيسترى ناريمان قىپشاقبايەۆ جانە بۇرىنعى قازكسر بالىق شارۋاشىلىعى ءمينيسترى قۇدايبەرگەن سارجانوۆ، قور وكىلدەرى جانە «عاسىر جوباسىنىڭ» ۇيىمداستىرۋشىلارى قاتىستى.
ا. توقماعانبەتوۆ اتىنداعى مادەنيەت ۇيىندە وتكەن سالتاناتتى شارادا وبلىس اكىمى قىرىمبەك كوشەربايەۆ حالىقارالىق ارالدى قۇتقارۋ قورىنىڭ مەرەيتويىمەن قۇتتىقتادى.
وبلىس اكىمى ارالدى قۇتقارۋ - ەلباسىنىڭ ەرەن ەڭبەگى ەكەنىن اتاپ ءوتتى.
«تاۋەلسىزدىكتىڭ العاشقى جىلدارىندا مەملەكەت باسشىسىنىڭ قاراۋىنا قىزىلوردا وبلىسىن تاراتۋ جانە ارال حالقىن كوشىرۋ تۋرالى قۇجاتتار ۇسىنىلدى. الايدا، ارالدىڭ جارقىن كەلەشەگىنە سەنگەن ەلباسى «عاسىر جوباسى» اتانعان - «سىرداريا وزەنىنىڭ ارناسىن رەتتەۋ جانە ارال تەڭىزىنىڭ سولتۇستىك بولىگىن ساقتاۋ» (ساراتس) جوباسىن ۇسىنىپ، ءولى تەڭىزگە جان ءبىتىردى»، - دەدى قىرىمبەك كوشەربايەۆ.
اتاپ ءوتۋ كەرەك، «سىرداريا وزەنىنىڭ ارناسىن رەتتەۋ جانە ارال تەڭىزىنىڭ سولتۇستىك بولىگىن ساقتاۋ» جوباسىنىڭ العاشقى كەزەڭىن ىسكە اسىرۋدىڭ ناتيجەسىندە ارال ايماعىندا بالىق شارۋاشىلىعىن دامىتۋعا زور مۇمكىندىك جاسالدى.
ەگەر 2003-جىلى تەڭىز بەن قالانىڭ ارالىعى 70 شاقىرىم بولسا، قازىر بۇل قاشىقتىق 17 شاقىرىمعا دەيىن ازايدى. 15 جىلدا ارال اۋدانىندا بالىق اۋلاۋ كولەمى 83 ەسەگە ارتتى، ەگەر 2003-جىلى 83 توننا بالىق اۋلانسا، 2017-جىلى 6934 تونناعا جەتتى. بۇرىن 7 عانا بالىق ءتۇرى بولسا، وتكەن جىلى ولاردىڭ سانى 22 گە كوبەيدى. بۇعان دەيىن ارالدا 4 بالىق وڭدەۋ زاۋىتى بولسا، قازىرگى كەزدە وبلىس بويىنشا جىلدىق قۋاتتىلىعى 11 مىڭ توننادان اساتىن 8 كاسىپورىن جۇمىس ىستەپ تۇر.
ارالدىڭ جاندانۋى اۋداننىڭ الەۋمەتتىك-ەكونوميكالىق دامۋىنا وڭ اسەرىن تيگىزدى. ونەركاسىپتىك كاسىپورىن سانى ۇشەۋدەن جەتىگە كوبەيدى. 2003-جىلى جۇمىس ىستەپ تۇرعان شاعىن جانە ورتا بيزنەس سۋبەكتىلەرىنىڭ سانى 874 بولسا، 2017 -جىلى ولاردىڭ قاتارى 3266 بىرلىككە ارتتى. 2003-2017-جىلى پايدالانۋعا بەرىلگەن تۇرعىن ۇيلەر سانى 2 ەسەگە (9,1 مىڭ شارشى مەتردەن 19,2 شارشىمەترگە) ءوستى.
الەۋمەتتىك نىساندار - مەكتەپ، اۋرۋحانالاردىڭ سانى دا ارتتى. 15 جىلدا ارال اۋدانىندا 29 مەديتسينالىق مەكەمە جانە 31 مەكتەپ سالىنعان. 2003-جىلى 7 بالاباقشا بولسا، قازىر 52 بوبەكجاي جۇمىس ىستەيدى.
قازىرگى كەزدە ارال اۋدانىندا 78 مىڭ ادام تىرشىلىك كەشىپ جاتىر.
اۆتور: ەلۋباي اۋەزوۆ
