ۇلتتىق وليمپيادا كوميتەتتەرى توكيو وليمپياداسىنا دايىندىق كەزدەسۋلەرىن باستادى

ق ر ۇ و ك- ءنىڭ باسپا ءسوز قىزمەتى تاراتقان مالىمەتتەرگە سۇيەنسەك، توكيودا 2020-جىلى وتەتىن وليمپيادا ويىندارىنا ۇلتتىق وليمپيادا كوميتەتتەرىنىڭ قاتىسۋىمەن وتەتىن بەس دايىندىق كەزدەسۋدىڭ ءۇشىنشى وتىرىسى ءوتىپ جاتىر.

كەزدەسۋ بارىسىندا توكيو-2020 ويىندارىنا دايىندىق پەن جوسپار قاراستىرىلۋدا. اتالعان كەزدەسۋگە قازاقستان اتىنان حالىقارالىق قاتىناستار دەپارتامەنتىنىڭ باسشىسى ءالىمجان اقايەۆ قاتىسۋدا.

توكيوداعى XXII جازعى وليمپيادا ويىندارىنىڭ باعدارلاماسىنا 33 سپورت ءتۇرى ەندى. اراسىندا جاڭادان قوسىلعان بەيسبول، كاراتە، سەرفينگ، قۇزعا شىعۋ جانە سكەيتبوردينگ سىندى سپورت تۇرلەرى بار. توكيو وليمپياداسىنىڭ ۇيىمداستىرۋ كوميتەتىنىڭ جوسپارى بويىنشا ءتورت جىلدا ءبىر وتەتىن ءدۇبىرلى دوداعا 11090 سپورتشى قاتىسادى دەپ كۇتىلۋدە. جارىسقا قاتىسۋشى سپورتشىلاردىڭ 48,5 پايىزىن ايەلدەر قۇرايدى دەپ جوسپارلانۋدا.

ايتا كەتەيىك، 2020-جىلعى وليمپيادا ويىندارىنا بىرنەشە سپورت تۇرلەرىنەن قوسىمشا سايىستار ەنگىزىلدى. ولار: جەڭىل اتلەتيكادان 4x100 مەتر قاشىقتىقتا سايىس، دزيۋدودان كوماندالىق سايىس، ساداقپەن اتۋ جانە ترياتلوننان ارالاس كوماندالىق سايىس، باسكەتبولدان 3x3 سايىسى (ەرلەر، ايەلدەر)، ۇستەل تەننيسىنەن ارالاس جۇپتىق سايىس، سەمسەرلەسۋدەن كوماندالىق سايىس، جۇزۋدە 800 مەتر (ەرلەر) جانە 1500 مەتر (ايەلدەر) قاشىقتىقتاعى سايىس، ۆەلوسپورتتا «مەديسون» (ەرلەر، ايەلدەر) سايىسى.

ناۋرىزدىڭ 27 ءسى مەن 28-ىندە ۇ و ك وكىلدەرىنىڭ قاتىسۋىمەن 2020-جىلعى وليمپيادا ويىندارىنىڭ نىساندارى كورسەتىلەدى. ۇيىمداستىرۋ كوميتەتىنىڭ مالىمدەۋىنشە، كوپتەگەن سپورت كەشەندەر كەلەر جىلدىڭ جازىندا ىسكە قوسىلادى.

اۆتور: كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى