ەستونيادا قازاق اندەرى شىرقالدى
قازاقستاندىق ونەر مايتالماندارى تالليندەگى قازاق قاۋىمداستىعىنىڭ ۇيىمداستىرۋىمەن ناۋرىز مەرەكەسىن تويلاپ، وندا ءشامشى مەن ابايدىڭ اندەرىن اۋەلەتتى. سونداي-اق، قازاقتىڭ ءداستۇرلى اندەرى مەن كلاسسيكالىق شىعارمالارىن ورىنداپ، بىرنەشە كۇيلەر شەرتتى. ءسويتىپ ءدۇيىم جۇرتتىڭ ىستىق ىقىلاسىنا بولەندى.
بۇدان بولەك، ق ر مادەنيەت قايراتكەرى، وبلىستىق وپەرا جانە بالەت تەاترىنىڭ ءانشىسى ءۇرالحان سەيىلبەكوۆا مەن ەرلان جاندارباي XX عاسىردىڭ الەمگە ايگىلى وپەرا سوليستى گەورگ وتس اتىنداعى «Sُprus -2018» فەستيۆالىنىڭ گالا-كونسەرتىنە قاتىسىپ، ءان شىرقادى. قازاقتىڭ ۇلتتىق كيىمىمەن ساحناعا شىققان قوس انشىگە سوعىلعان شاپالاق ءبىرازعا دەيىن توقتاماعان. وپەرا ءانشىسى ءۇرالحان سەيىلبەكوۆا «بۇلبۇل» انىنەن كەيىن حالىقتىڭ سۇرانىسى بويىنشا قازاقتىڭ تاعى ءبىر ءانىن كوپشىلىككە تارتۋ ەتسە، ەرلان جانداربايدىڭ شىرقاعان يتاليانشا ءانى كورەرمەن كوڭىلىنەن ەرەكشە ورىن العان.
ايتا كەتسەك، فينليانديا رەسپۋبليكاسىنىڭ حەلسينكي قالاسىندا وتەتىن «جۇمباق جىبەك جولى» حالىقارالىق اشىق ورتاازيالىق فەستيۆالىنە قازاقستاننىڭ اتىنان قاتىسۋ ءۇشىن ش. قالداياقوۆ اتىنداعى وبلىستىق فيلارمونيانىڭ ءداستۇرلى انشىلەرى مەن وبلىستىق وپەرا جانە بالەت تەاترىنىڭ سوليستەرى، وبلىستىق مادەنيەت جانە حالىق شىعارماشىلىعى ورتالىعىنىڭ وكىلدەرى اتتانعان بولاتىن.
كۇنى بۇگىنگە دەيىن، اتالعان ەلدىڭ ءبىرقاتار قالالارىن ارالاپ كونسەرتتىك باعدارلامالارمەن جۇرتشىلىقتى ءتانتى ەتىپ ۇلگەرگەن ونەرپازدار شۆەتسياداعى قازاق ۇلتتىق مادەني ورتالىعىنىڭ ناۋرىز مەيرامىنا دا قاتىستى.
