الماتى وبلىسى تۋريستەردى سيىر ساۋىپ، ءشوپ شابۋمەن قىزىقتىرىپ كورمەك

ءوڭىر اگروتۋريزمدى دامىتۋعا وتە قولايلى ءوڭىر. سەبەبى حالىقتىڭ 70 پايىزى اۋىلدى جەردە تۇرادى. جەر ءجانناتى جەتىسۋدا تۋريزمدى شۇرايلى تابيعاتىمەن عانا ەمەس، وندا تۇراتىن حالقى جانە ولاردىڭ كۇندەلىكتى كاسىبىمەن دە دامىتۋعا بولادى. وسىعان وراي، تالدىقورعاندا وبلىستىق تۋريزم باسقارماسى، «اتامەكەن» كاسىپكەرلەر پالاتاسى جانە ورتالىق ازيا ۋنيۆەرسيتەتىنىڭ ۇيىمداستىرۋىمەن ەكىكۇندىك شەبەرلىك ساعاتى ءوتىپ جاتىر. سەمينار بارىسىندا تىڭداۋشىلارعا ءقوناقۇي بيزنەسىن جۇرگىزۋ جانە اگروتۋريزمنىڭ مودەلدەرى بويىنشا دارىستەر وقىلىپ، مىسالدار كەلتىرىلۋدە.

 جالپى اگروتۋريزم ەۋروپا ەلدەرىندە 1970 - جىلدارى قولعا الىنعان. ال ت م د ەلدەرىنە 1990 -جىلدارى كەلگەن. «قازاقستاننىڭ كەز كەلگەن وڭىرىندە اگروتۋريزمدى قولعا الۋعا بولادى. سەبەبى ءار وبلىستىڭ ءوز تابيعي جانە اۋىلشارۋاشىلىق ەرەكشەلىكتەرى بار» ، - دەيدى ءال- فارابي اتىنداعى قازاق ۇلتتىق ۋنيۆەرسيتەتى رەكرەاتسيالىق گەوگرافيا كافەدراسى دوتسەنتىنىڭ مىندەتىن اتقارۋشى، گەوگرافيا عىلىمدارىنىڭ كانديداتى ءاليا اقتىمبەكوۆا.

 عالىمنىڭ ايتۋىنشا تۋريستەر سوڭعى كەزدە سيىر ساۋ، ءشوپ شابۋ، كارتوپ قازۋ سىندى بەلسەندى ەڭبەك دەمالىسىن تاڭداي باستاعان. ولارعا اۋىلشارۋاشىلىق ونىمدەرىن بىرگە دايىنداۋ، ءوندىرۋ پروتسەستەرى وتە قىزىق. ال الماتى وبلىسىندا مۇنداي مۇمكىندىك مولىنان. كەز كەلگەن اۋىلدا مال دا، جەر دە بار. مونيتورينگ دەرەكتەرى بويىنشا، 2017 -جىلى تۋريستەردى ورنالاستىراتىن 680 ورىن تىركەلگەن. ول جەردە 1,5 ميلليون ادام تىنىعىپ قايتقان. ەمدىك- ساۋىقتىرۋ قىزمەتتەرىنىڭ كولەمى 8 ميلليارد 310 ميلليون تەڭگەگە جەتتى. بۇل 2016 -جىلمەن سالىستىرعاندا 50 پايىزعا ارتىق. بيىل تۋريستەر اعىمىن 1,6 ميلليون ادامعا، ەمدىك- ساۋىقتىرۋ قىزمەتى كولەمىن 8,8 ميلليارد تەڭگەگە دەيىن جەتكىزۋ جوسپارلانىپ وتىر.

اۆتور: سامال قابىشيەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى