دانيال احمەتوۆ توتەنشە جاعداي قىزمەتىنە قوسىمشا قارجى بولگىزبەك
وبلىستاعى سۋ تاسقىنىنا بايلانىستى وتكەن بريفينگتە دانيال احمەتوۆ ءۇيى جارامسىز بولىپ قالعان تۇرعىنداردىڭ بارلىعىنا باسپانا بەرىلەتىنىن ايتتى.
مۇنداي كومەك اياگوز، گلۋبوكوە، شەمونايحا اۋدانى مەن وسكەمەن قالاسىنىڭ تاسقىننان زارداپ شەككەن تۇرعىندارىنا كورسەتىلمەك. اياگوز اۋدانىندا باسپانا ساتىپ الۋعا قاجەت قارجى ءبولىنىپ قويعان. ءۇيسىز قالعان وتباسىلاردىڭ الدى جاڭا باسپاناسىنا كوشىپ تە ۇلگەردى. مۇندا 14 ءۇي قۇلاپ، 19 ءۇي اپاتتىق جاعدايعا تۇسكەن بولاتىن. ولاردىڭ ورنىنا ءۇي ساتىپ الۋ ءۇشىن قايىرىمدىلىق قورلارى مەن رەزەرۆتىك قوردان قارجى بولىنۋدە. ال قۇلاعان ءۇيدىڭ جەر تەلىمدەرى مەملەكەت مەنشىگىنە وتپەك.
دانيال احمەتوۆ گلۋوبوكوە اۋدانىندا مۇنداي كولەمدەگى جاڭبىر سوڭعى 30 جىلدا بولماعانىن ايتتى. 2 كۇننىڭ ىشىندە اۋدانعا ءۇش ايدىڭ مولشەرىنە پارا- پار جاۋىن تۇسكەن. كونەكوز تۇرعىندار مۇنداي جاۋىن وسىدان 30 جىل بۇرىن بولعانىن ايتقان. قار جۇقا تۇسكەندىكتەن، تەرەڭدەپ كەتكەن توڭ ءجىبىپ ۇلگەرمەي، قار سۋى جەردىڭ بەتىمەن اققان.
ال شەمونايحا اۋدانىندا ۇبە وزەنىنەن سەڭ ءجۇرۋ سالدارىنان 42 ءۇيدى سۋ الىپ، 35- ءى قيراعان. وسكەمەندەگى تاسقىنعا توقتاۋسىز جاڭبىر مەن تاۋدان اققان قار سۋى سەبەپكەر بولعان. سونىڭ سالدارىنان 72 ءۇي سۋ استىندا قالىپ وتىر. ونىڭ تەك 14-ىنەن سۋ سورعىتىلعان. كاتونقاراعاي اۋدانىندا 6 ءۇيدى سۋ باسىپ، 3- ءۋى جارامسىز كۇيگە ءتۇستى.
وبلىس اكىمى باسپاناسى بۇلىنگەن تۇرعىنداردىڭ ەشبىرى ءۇيسىز قالمايتىنىن اتادى. بريفينگتە تاسقىنعا ۇشىراعان اۋدان، قالالاردىڭ اكىمدەرى دە ءسوز سويلەپ، جاعدايدى باياندادى. زىريان اۋدانى مەن ريددەر قالاسىندا جاعداي ازىرشە تۇراقتى. بۇل ەكى وڭىرگە تاسقىن كەشىگىپ جەتەتىن ءتۇرى بار. سەمەيدە 5 ساياجاي ءۇيىن سۋ العان.
بريفينگ سوڭىندا دانيال احمەتوۆ توتەنشە جاعدايلار دەپارتامەنتىنە 289 ميلليون تەڭگە بولىنەتىنىن مالىمدەدى.
«توتەنشە جاعداي قىزمەتىنىڭ ءوز ۆەدومستۆوسى بار. دەگەنمەن سوڭعى جاعدايلار بۇل قىزمەتتى ءالى جابدىقتارمەن تولىقتىرۋ كەرەكتىگىن كورسەتتى. 289 ميلليون تەڭگە وسى ماقساتتا ءبولىنىپ وتىر. قاجەت بولسا تاعى بولۋگە دايىنبىز» - دەدى ول.
اۆتور: ەسىمجان ناقتىباي
