ارزان تاۋارعا قىزىققان اقتوبەلىكتەر ينتەرنەتتەگى جارنامالارعا الدانىپ قالدى
كولىكتىڭ قوسالقى بولشەكتەرىن، قۇندىز توندى ارزان باعاعا ساتىپ الامىن دەپ الدانعاندار سانى كۇن وتكەن سايىن ارتىپ كەلەدى، دەپ حابارلايدى قازاقپارات ءتىلشىسى.
اقتوبە وبلىستىق ءى ءى د الاياقتارعا الدانعان اقتوبەلىكتەردى مىسالعا كەلتىرىپ، ينتەرنەت ارقىلى تاپسىرىس بەرگەن كەزدە نەمەسە تاۋار ساتىپ العاندا اباي بولۋعا شاقىردى. تاۋار باعاسىن ارزانداتىپ نەمەسە ءتيىمدى بيزنەس ۇسىنىپ جاتقاندار رەسەيدە وتىرىپ، اقتوبەلىكتەردى توناپ جاتىر.
«ەكىنشى دەڭگەيلى بانك ارقىلى اقشا اۋدارىلعان سوڭ ساتۋشىلار بايلانىستى ءۇزىپ، ءىز-ءتۇزسىز كەتەدى. ال اقتوبەلىكتەر تاۋارىن توسىپ ءجۇر. ولار جۇزدەگەن مىڭ تەڭگەسىن جوعالتتى. سونىمەن قاتار، ينۆەستور بولىپ، پايدا تابۋدى ۇسىنعاندارعا دا الدانعاندار بار. شەتەل ۆاليۋتاسىمەن اقشا اۋدارۋدى سۇراپ، كەيىن جوعالىپ كەتكەن. اقشا رەسەيگە اۋدارىلدى. ماسەلەن، ەكى اقتوبەلىك ينۆەستور بولىپ، بايۋ ءۇشىن 11 مىڭ دوللار اقشاسىن اۋدانىپ جىبەردى. ساتۋ-ساتىپ الۋ كەزىندە اباي بولۋ قاجەت ەكەنىن ەسكەرتەمىز. الدىن الا اقشا اۋدارۋعا بولمايدى»، - دەپ حابارلادى وبلىستىق ءى ءى د باسپا ءسوز قىزمەتى.
بەيتانىس ادامعا بانك ەسەپشوتىنىڭ ءنومىرىن بەرۋگە بولمايدى. اقشا اۋدارىپ، الدانىپ قالعانىن سەزگەن ادام بىردەن ىشكى ىستەر ورگاندارىنا حابار بەرۋى ءتيىس.
«تاياۋدا 54 جاستاعى اقتوبەلىك الدانىپ قالدى. بەلگىسىز ادام «اۆتوبۋس ساتىپ الىپ بەرەمىن» دەپ اقتوبەلىكتىڭ ەسەپشوتىنداعى 8,1 مىڭ دوللارىن الىپ كەتكەن. قازىرگى ۋاقىتتا الاياقتىق جاساعانداردىڭ ءىسى تەرگەلىپ جاتىر»، - دەدى وبلىستىق ءى ءى د باسپا ءسوز قىزمەتى.
