تۇرعىن ءۇي قۇرىلىس جيناق بانكىن جەكەشەلەندىرۋدەن كەيىن قانداي وزگەرىستەر بولادى
مينيستر اتالعان شارادان كەيىنگى وزگەرىستەر مەن ينۆەستورعا قويىلاتىن نەگىزگى تالاپتاردى دا جاريالادى، دەپ حابارلايدى قازاقپارات ءتىلشىسى.
«بۇگىندە تۇرعىن ءۇي قۇرىلىس جيناق بانكى «نۇرلى جەر» باعدارلاماسىنىڭ ءبىر باعىتىن ىسكە اسىرىپ كەلەدى. اتالعان مىندەت قالا بەرەدى. سالىمشىلارعا مەملەكەتتىڭ 20 پروتسەنتتىك سىياقىسى دا تولەنەدى. بارلىق شارتتار قالادى. ءبىر عانا وزگەرىس بولادى. بانكتىڭ قازىرگى يەسى - «بايتەرەك» حولدينگىنىڭ ورنىنا باسقا ينۆەستور كەلەدى. الايدا تۇرعىن ءۇي قۇرىلىس جيناق بانكىنىڭ نەگىزگى ءرولى وزگەرمەيدى»، - دەدى ت. سۇلەيمەنوۆ بۇگىن پارلامەنت ءماجىلىسىنىڭ وتىرىسىندا.
ءمينيستردىڭ ايتۋىنشا، بانكتى جەكەشەلەندىرۋدەن ءبىراز پايدا تۇسەدى. ول اقشانىڭ ءبارى ۇلتتىق قورعا سالىنادى. ال جاڭا ينۆەستوردىڭ كەلۋىمەن كورپوراتيۆتى باسقارۋ جۇيەسى جاقسارىپ، جۇمىستىڭ تيىمدىلىگى ارتادى دەگەن سەنىم بار. «بىرىنشىدەن، بارلىق شارتتار ساقتالادى. ەكىنشىدەن، تۇرعىن ءۇي قۇرىلىس جيناق بانكى «نۇرلى جەر» باعدارلاماسىنا قاتىسا بەرەدى. بالكىم، «7-20-25» - كە دە (يپوتەكالىق باعدارلاما - اۆت. ) قاتىسادى. سونىڭ ءبارى ءتيىستى قۇجاتتاردا كورسەتىلەدى. ينۆەستور كەلىسپەسە، بانك ساتىلمايدى. ۇشىنشىدەن، مەملەكەتتىڭ سىياقىسى ساقتالادى. مىنە، وسى شارتتار ينۆەستوردىڭ الدىنا قويىلادى. وعان كەلىسسە، بانك ساتىلادى. كەلىسپەسە، باسقاسىن ىزدەيمىز»، - دەپ اتاپ كورسەتتى ت. سۇلەيمەنوۆ.
«بايتەرەك» ۇلتتىق باسقارۋشى حولدينگى باسقارما ءتوراعاسىنىڭ ورىنباسارى عالىمجان تاجياقوۆتىڭ ايتۋىنشا، جەكەشەلەندىرۋ كەزىندە بانكتىڭ 49 پروتسەنتى ينۆەستورعا ساتىلادى. ال اكسيانىڭ 51 پروتسەنتى مەملەكەتتىڭ يەلىگىندە قالادى. «بۇگىندە ينۆەستور ءالى انىقتالماعان. جوسپار بويىنشا جىلدىڭ ورتاسىندا ءبىز ناقتى ينۆەستوردى تاڭداپ الامىز. ناقتى ۇسىنىستاردى الىپ، ءبارىن جان-جاقتى پىسىقتايتىن بولامىز»، - دەدى ع. تاجياقوۆ.
