قايرات نۇرتاس: وتباسىمدى، بالالارىمدى ونەرگە بەرگىم كەلمەيدى
ينە شانشار جەر بولماعان بۇل شوۋدىڭ باستى ەرەكشەلىگى، ءانشى جانۇياسىنىڭ ءار مۇشەسىن ءدۇيىم جۇرتقا تانىستىرعان بولاتىن. Stan.kz تىلشىسىنە سۇحبات بەرگەن حيتمەن، مۇنداي وي اناسى گۇلزيرا ايداربەكوۆانىڭ يدەياسىنان تۋىنداعانىن ايتادى.
«قۇدايعا شۇكىر. وسى ۋاقىتقا دەيىن انامنىڭ ايتقانىمەن ءجۇرمىن. سەبەبى ول كىسى، بىرىنشىدەن، مەنەن كوپتى كورگەن. ەكىنشىدەن، ول مەنىڭ انام ءارى ماعان جاناشىر. ەشقاشان بالاسىنا جامانشىلىق ويلامايدى. سوندىقتان بىردەن كەلىسىمىمدى بەردىم. سەبەبى وسى ۋاقىتقا دەيىن بولىپ جاتقان ءبىزدىڭ ەڭبەگىمىزدىڭ ءبارى سول انامنىڭ ايتۋىمەن كەلە جاتقان سوڭ، بارلىعى ىسكە اسىپ جاتىر. سوندىقتان مەن ەش قورىقققان جوقپىن. انام نە ايتادى، سول بولادى» ، - دەيدى قايرات.
بۇل كەشتە ءانشىنىڭ اتا- اناسى، جۇبايى، ىنىسىمەن قاتار، ءتورت پەرزەنتى دە ونەر كورسەتتى. ءانشىنىڭ تۇڭعىشى سەزىم فورتەپيانودا ويناسا، ەكىنشى قىزى الاۋ بيشىلىك ونەرىمەن تانىلدى. ال ءۇشىنشى بالاسى نارۇل مەن كەنجەسى حان اكەسىمەن قوسىلا ءان شىرقاعان. ءبىراق قايرات ۇل- قىزدارىنىڭ ونەرگە كەلۋىن قولداپ وتىرعان جوق.
«نەگىزى مەن بالالارىمدى وقۋ جاعىنا بەرگەنمىن. ءبارى جاقسى مەكتەپتە وقيدى. ال ءان، فورتەپيانو، دومبىرا، ونىڭ بارلىعى جاي حوببيلەرى بولىپ قالادى. مەن شىنىمدى ايتسام، ءوزىمنىڭ وتباسىمدى، كىشكەنتايلارىمدى ونەرگە بەرگىم جوق. ويتكەنى ونەر دەگەن وتە قيىن جول. سەبەبى وسى ءبىر ايدىڭ ىشىندە رەكورد جاساعان شىعارمىن. 27 رەت ۇشاقپەن ۇشىپپىن. ونىڭ ءوزى قانشاما دەنساۋلىق. ءبىراق ەندى قۇداي مەنىڭ باسىما وسى باقتى بۇيىرتقان ەكەن. بۇل مەنىڭ كىشكەنتاي كەزىمدەگى ارمانىم تۇعىن. ارمانىم ورىندالدى. ەندى مەندە ارتقا شەگىنەر ەشقانداي جول جوق. ەندى وسى شىڭدى ۇستاپ تۇرۋ. سوندىقتان ءوزىم ەشقاشان وكىنبەيمىن. ال وتباسىما كەلەتىن بولساق، ونەرگە بەرگىم كەلمەيدى» ، - دەيدى ءانشى.
جۇلدىزدى جانۇيانىڭ سوزىنە سەنسەك، قايراتتىڭ كىشى اتۇستارى حاننىڭ مۋزىكاعا دەگەن قابىلەتى ەرەكشە. بولاشاقتا گۇلزيرا ايداربەكوۆا نەمەرەسىنە پروديۋسەرلىك ەتسە، جۇلدىزدى اكە كەنجەسىن قولداۋدا قول قۋسىرىپ قالمايتىنىن ايتادى.
«اتا- انامنان اسىپ ەشقايدا بارا المايمىن. ەگەر سول كىسىلەر حاننىڭ ساحنادا تۇرعانىن كورگىسى كەلسە، مەن كەلىسپەي قايدا بارامىن. ءبىراق مەنىڭ ءوز باسىم بەرگىم جوق. سەبەبى مەن كوردىم. وتە قيىن. دەنساۋلىققا قانشاما زيانى بار. قانشا ادامنىڭ سوزىنە قالاسىڭ. كىشىپەيىل بولۋ كەرەك، شىدامدى بولۋ كەرەك دەگەندەي... ەگەر باسىنا سونداي باق بەرىپ جاتسا، اللانىڭ قالاۋى سولاي بولىپ جاتسا، وندا مەن ەشقانداي دا بوگەت جاساي المايمىن، قولدايمىن» ، - دەيدى جۇلدىزدى اكە.
قايرات بۇل جولى فونوگراماعا سۇيەنبەگەن. ءبىر كۇندە ەكى كەشتى جاندى داۋىستا وتكىزۋ حيتمەن ءۇشىن قانشالىقتى قيىن؟ سۇراپ كوردىك...
«تاماعىم جاقسى. كونسەرت باستالعان كەزدە تاماعىم اۋىرادى. ال كونسەرت قالاي بىتەدى، بارلىعىن ۇمىتاسىڭ. راحاتتانىپ، تاماعىڭ اشىلىپ، كۇشتى بولىپ قالاسىڭ. قازىر بانكەت بولادى. سول جاققا بارىپ ءان ايتىپ، قۇتىرىپ كەتەسىڭ. ال ساحناعا شىعاردىڭ الدىندا، قانداي دا ءانشى، ونەرپاز بولسىن ءسال قوبالجيدى. ءبىراق مەنىڭ تاماعىم قازىر اۋىرىپ تۇرعان جوق. كاراوكەدە دە 20-30 ولەڭ قاتارىنان ايتىپ ءجۇرمىز عوي. سوندىقتان جاندى داۋىستىڭ ەش قيىندىعى جوق» ، - دەيدى قايرات نۇرتاس.
ايتا كەتەيىك، كوپشىلىكتىڭ ىستىق ىقىلاسىنا بولەنگەن ءانشى بۇگىن تىڭدارماندارىنا تاعى ءبىر توسىن سىي جاساماق. قايراتتىڭ كومانداسى ناۋرىز مەرەكەسىنىڭ قۇرمەتىنە وراي، الماتىداعى «استانا» الاڭىندا قالا تۇرعىندارى مەن قوناقتارىنا تەگىن كونسەرت قويىپ بەرمەك.
