كوكتەم مەرەكەسىن تۇرىكمەندەر قالاي تويلايدى - فوتو
ناۋرىزدى تۇرىكمەندەر نوۆرۋز دەيدى. بۇل مەيرام تۋىسقان تۇرىكمەن حالقىنىڭ دا مادەنيەتىمەن، ومىرىمەن، تاريحي شەجىرەسىمەن استاسىپ جاتىر. جىل سايىن جاڭارۋ مەرەكەسىنە وراي تۇرىكمەنستانعا الەمنىڭ كوپتەگەن ەلدەرىنەن كەلگەن قوناقتار ۇلتتىق تاعامداردان ءدام تاتىپ، بىرگە تويلايدى.
مەرەكەنىڭ باستى شارالارى تابيعاتى تاماشا تاۋ باۋرايىنداعى «Nowruz ýaýlasy» الاڭىندا وتەدى. وندا اشىق اسپان استىندا تۇرىكمەندەردىڭ ءداستۇرلى تۇرمىسىن ورنەكتەيتىن سالتاناتتى ەكسپوزيتسيا قۇرىلادى. ويتكەنى كۇن مەن ءتۇن تەڭەلگەن مەيرام كوكتەمگى ەگىن سالۋمەن، تىرشىلىكتىڭ ويانۋىمەن تىعىز بايلانىستى.
ەكسپوزيتسيانى مۋزىكالىق- ەتنوگرافيالىق ۇجىمدار ارنايى دايىنداپ كەلگەن ونەرلەرىمەن سۇيەمەلدەيدى. ال قولدانبالى ونەر تۋىندىلارىنىڭ كورمەسىندە قوناقتار نازارىنا حالىقتىڭ ەجەلگى تۇرمىس- تىرشىلىگىنەن سىر شەرتەتىن، ەگىن سالۋ، جەر جىرتۋ، قولونەر بۇيىمدارىن جاساۋ جۇمىستارىنا ارنالعان كورىنىستەر ۇسىنىلادى.
ايەلدەر جاعى نوۆرۋز اندەرىن شىرقاپ، استىق وڭدەۋدىڭ، ديىرمەندە ۇن تارتۋ ءتۇرلى كەزەڭدەرىن كورسەتىپ، الۋان ءتۇرلى تاتتىلەر، چۋرەكا، پيشمە، لاعمان سياقتى نەبىر ءدامدى تاعامدار ازىرلەيدى.
مەرەكەدە ات سپورتىنىڭ «گالكىنىش» توبىنىڭ ارتىستەرى تۇرىكمەننىڭ اسىل تۇقىمدى اقالتەكە اتتارىنا ءمىنىپ، تاماشا ونەرلەرىمەن جينالعان جۇرتتى تامساندىرادى.
حالىق قولونەر تۋىندىلارىنىڭ كەرەمەت ۇلگىسى - تۇرىكمەن كىلەمدەرى. «Nowruz ýaýlasy» الاڭىنداعى كىلەم كورمەسىنە كەلگەن ادام تۇرىكمەندەردىڭ ءارى سۇلۋ، ءارى توزبايتىن كىلەمدەرىن توقۋ ۇلكەن ماشاقات پەن ەڭبەكتى، سابىردى، سونىمەن قاتار زەرەك ويدى تالاپ ەتەتىنىنە كوز جەتكىزەدى.
