اقتوبەدە ءبىر شاقىرىم داستارحان جايىلدى
مەرەكەگە جينالعان حالىقتىڭ كوڭىل- كۇيىنە كوكتەمگى قۇبىلمالى اۋا رايى كەدەرگى بولمادى. ورتالىق ساياباقتا تىگىلگەن كيىز ۇيلەر مەن شاتىرلار الاڭىنا قوناقتار ەرتەمەن جينالدى. ناۋرىز كۇنگى جاۋىن- شاشىندى حالقىمىز ىرىسقا بالاپ، جىلدىڭ جەمىستى بولاتىندىعىنا سەنگەن. بۇگىن دە جينالعاندار ءبىر ءبىرىن ۇلى مەرەكەمەن قۇتتىقتاپ، يگى تىلەكتەر ءبىلدىردى.
سامارقاننىڭ كوك تاسى ەرىپ، سارى ارقانىڭ سالتاناتى جاراسقان كۇنى جاڭارۋ مەرەكەسىن جۇرتشىلىق جايدارى كوڭىلمەن قارسى الدى. ورتالىق ساياباق الدىنداعى ساحنادا «امال كەلدى. جىل كەلدى» تەاترلاندىرىلعان كورىنىستەر قويىلىپ، قازاقتىڭ ەجەلگى سالت- داستۇرلەرىن تاعى ءبىر مارتە كورەرمەندەردىڭ ەسىنە سالدى. ال قولدانبالى ونەر شەبەرلەرى ۇلتتىق ناقىشپەن جاسالعان بۇيىمدار كورمەسىن ۇيىمداستىرعان. بيىلعى ناۋرىزدىڭ ەرەكشەلىگى، شامامەن ءبىر شاقىرىمعا سوزىلعان ەڭ ۇزىن داستارحان بولدى. جىل ون ەكى اي اسىعا كۇتەتىن ناۋرىزكوجەنىڭ بىرنەشە تۇرىنەن ءدام تاتۋعا بولادى.
قازاقستان حالقى اسسامبلەياسىنىڭ ايماقتاعى وكىلدەرى قازاقتىڭ كوجەسىنەن بولەك وزگە دە تۇركى ۇلتتارىنىڭ مەرەكەلىك اسىن دايارلاعان. تابيعاتپەن ەتەنە ەگىز وسكەن ۇلى دالا ەلى ءۇشىن جەر- جاھاننىڭ جاڭارىپ، جاڭعىرعان كۇنى ەرەكشە مەرەكە. بۇل كۇن اق پەيىل مەن تاتۋلىق كۇنى دەسەك، جۇزدەن استام ۇلت پەن ۇلىس بىرلىكتە ءومىر سۇرەتىن قازاقستاندى ايشىقتايدى دەسە ارتىق ايتقاندىق ەمەس. وتكەندى سارالاپ، بولاشاقتى بولجايتىن ساتتە وتانىمىزعا - بەرەكە، حالقىمىزعا - يگىلىك، ال ءار شاڭىراققا باقىت پەن شاتتىق تىلەيمىز. ەسىگىمىزدەن تورگە اتتاعان ءيت جىلى قۇتتى بولسىن!
www.24.kz
