كۇيشى سەكەن تۇرىسبەكوۆ ونەرپاز جاستارعا باتا بەردى
بۇگىن الماتى قالاسىندا جاستار رەسۋرستىق ورتالىعىندا قالالىق جاستار ساياساتىن دامىتۋ قورىنىڭ ۇيىمداستىرۋىمەن «NAURYZDEPO» مەرەكەسى ءوتتى.
سالتاناتتى مەرەكەدە قازاق حالقىنىڭ ۇلكەنگە قۇرمەت، كىشىگە ىزەت جولىمەن باتا بەرۋ سالتى كورسەتىلدى. باتانى ق ر ەڭبەگى سىڭگەن قايراتكەرى، «پاراسات»، «قۇرمەت» وردەندەرىنىڭ يەگەرى، تانىمال كۇيشى سەكەن تۇرىسبەكوۆ بەردى.
« ۇلىستىڭ ۇلى كۇنى قۇتتى بولسىن! بارلىعى باياندى بايسالدى بولسىن. ەل ىرگەسى بەرىك، اعايىن امان، توڭىرەك تۇگەل بولسىن. اي جىلعا ۇلاسىپ، حالقىمىز ناۋرىزدان ناۋرىزعا امان جەتە بەرسىن»، - دەدى سەكەن تۇرىسبەكوۆ.
مەرەكەلىك جيىنعا سەكەن تۇرىسبەكوۆ ءوزى قۇرعان «اق جاۋىن» ءانسامبلىن الا كەلىپ، بۇگىنگى جىل باسىن تويلاۋعا ارنالعان مەرەكەدە ونەر ۇجىمىنىڭ تۇساۋىن كەستىردى. ءوزى دە قولىنا دومبىرا الىپ، «كوڭىل تولقىنى» كۇيىن شەرتىپ بەردى.
«اق جاۋىن» ءانسامبلى العاش رەت بۇگىن ساحناعا شىقتى. ەرتەڭ جازۋشىلار وداعىندا ونەر كورسەتەدى. 30 - ناۋرىز كۇنى جاراسقان ءابدىراش اعامىزدىڭ 70 جىلدىعىندا رەسپۋبليكا سارايىندا وزدەرىن تاعى دا تانىتپاق. انسامبلدە 18 ادام، انشىلەرمەن 21 ادام. قۇرىلعانىمىزعا مىنە، ءبىر جارىم ايعا ەندى تولدى»، - دەدى سەكەن تۇرىسبەكوۆ.
«اق جاۋىن» ءانسامبلىنىڭ مۇشەسى، دومبىراشى تولعاناي حاسەنوۆا ونەر ۇجىمىنىڭ ەرەكشەلىگىن ايتىپ بەردى.
«اق جاۋىن» ءانسامبلىنىڭ قۇرامىندا قۇرمانعازى اتىنداعى قازاق ۇلتتىق كونسەرۆاتورياسىنىڭ ستۋدەنتتەرى بار. رەپەرتۋرامىزدا سەكەن اعانىڭ كۇيلەرى بار. ماقساتىمىز - جاستارعا كۇيدى ناسيحاتتاۋ. ءبىز ورىندايتىن شىعارمالاردان ۆيولەنچەل، كامەرالىق دىبىستاردى ەستۋگە بولادى. بۇل ءبىزدىڭ ەرەكشەلىگىمىز. قازىرگى ۋاقىتتا رەپەرتۋارىمىزدا ءار ءداستۇرلى مەكتەپتەن 30-عا تارتا شىعارما بار»، - دەدى تولعاناي حاسەنوۆا.
سونىمەن قاتار، بۇگىنگى جاستارعا ارنالعان ناۋرىز مەرەكەسىندە وقۋشىلاردان قۇرالىپ، قازىرگى ۋاقىتتا الەمنىڭ بىرنەشە ەلىندە ءۇش ىشەكتى دومبىرانى تانىتىپ ۇلگەرگەن «ارناۋ» فولكلورلىق ەتنوگرافيالىق بالالار ءانسامبلى دە ونەر كورسەتتى.
«ءبىزدىڭ انسامبل مەكتەپ وقۋشىلارىنان قۇرالعان. قۇرىلعانىمزعا بيىل 10 جىل تولادى. وسى ۋاقىت ارالىعىندا بولگاريا، تۇركيا، يتاليا، بىرىككەن اراب امىرلىكتەرىندە ءۇش ىشەكتى دومبىرامىزدى تانىتىپ، حالىقارالىق بايقاۋلاردا جەڭىمپاز اتاندىق. ءبىزدىڭ انسامبلدە ءبىر بالاعا بىرنەشە اسپاپتا ويناۋعا ۇيرەتەمىز. اتاپ ايتقاندا، كونە اسپاپتاردى ەركىن مەڭگەرگەنبىز. رەپەرتۋرامىزدا اباي، شاكارىم، شاكىر ابەنوۆتىڭ شىعارمالارى بار. ءۇش ىشەكتى دومبىرانى جارقىن شاكارىم اتامىز دالەلدەسە، ءبىز ساحنادا تانىتىپ كەلەمىز»، - دەيدى انسامبل جەتەكشىسى، ءبىلىم بەرۋ ءىسىنىڭ ۇزدىگى نۇرگۇل اكىمقوجا.
سونداي- اق، شارادا توعىز قۇمالاق پەن ارقان تارتۋدان سايىس ءوتتى.
اۆتور: الماس مۇقاش ۇلى
