ق ر پرەزيدەنتى سامارقاندتىڭ كورىكتى جەرلەرىن ارالادى
ەكى ەلدىڭ باسشىسى سامارقاند قالاسىنداعى فورۋمدار كەشەنىندە كەزدەستى. پرەزيدەنتتەر ەكىجاقتى ىنتىماقتاستىق ماسەلەلەرىن تاعى ءبىر مارتە پىسىقتاپ، ارىپتەستىك بايلانىستاردى دامىتۋ جايىن تالقىلادى. بۇگىندە ورتالىق ازيا مەملەكەتتەرى، سونىڭ ىشىندە قازاقستان مەن وزبەكستان اراسىنداعى قارىم- قاتىناستار نىعايىپ كەلەدى. شەكارادان ءوتۋ شارالارى جەڭىلدەتىلگەننەن كەيىن ەكى ەلدىڭ حالقى جاقىنداي ءتۇستى، ءوزارا الىس- بەرىس تە كۇشەيىپ كەلەدى.
«كەلىسسوزدەر اياقتالعاننان كەيىن ەكى ەلدىڭ پرەزيدەنتتەرى حيزراتي حيزر مەموريالدى كەشەنىنە باردى. ول جەردە وزبەكستاننىڭ ءبىرىنشى پرەزيدەنتى يسلام كارىموۆ جەرلەنگەن. سونداي- اق، نۇرسۇلتان نازاربايەۆ شاۆكات ميرزيەيەۆپەن بىرگە سامارقاندتىڭ كورىكتى جەرلەرىن ارالاپ شىقتى»، - دەلىنگەن رەسمي حابارلامادا.
ايتا كەتەيىك، وتكەن اپتادا وزبەكستان پرەزيدەنتى شاۆكات ميرزيەيەۆ ورتالىق ازيا ەلدەرى باسشىلارىنىڭ جۇمىس كەزدەسۋىنە قاتىسۋ ءۇشىن استاناعا كەلگەن بولاتىن. اتالعان شارا اقوردادا ءوتتى. كەڭەسكە قىرعىزستان رەسپۋبليكاسىنىڭ پرەزيدەنتى سوورونباي جيەنبەكوۆ، تاجىكستان باسشىسى ەمومالي راحمون، وزبەكستان رەسپۋبليكاسىنىڭ پرەزيدەنتى شاۆكات ميرزيەيەۆ جانە تۇرىكمەنستان مەدجليسى ءتورايىمى اكدجا نۋربەردىيەۆا حانىم قاتىستى. ق ر پرەزيدەنتى نۇرسۇلتان نازاربايەۆتىڭ ايتۋىنشا، ورتالىق ازيا ەلدەرى باسشىلارىنىڭ بايلانىسى جاندانا ءتۇستى. كەشكە «استانا وپەرا» تەاترىندا وتكەن سالتاناتتى شارادا ن. نازاربايەۆ وزبەكستان پرەزيدەنتىن «دوستىق» وردەنىمەن ماراپاتتادى.
اۆتور: ارمان اسقاروۆ
