وڭتۇستىك قازاقستان وبلىسىنىڭ اكىمى زيالى قاۋىم وكىلدەرىمەن كەزدەستى
باسقوسۋعا وبلىس اكىمىنىڭ ورىنباسارلارى، باسقارما باسشىلارى، زيالى قاۋىم وكىلدەرى، وبلىستىق، قالالىق جانە اۋداندىق ارداگەرلەر كەڭەسىنىڭ ءتوراعالارى قاتىستى، دەپ حابارلايدى قازاقپارات ءتىلشىسى.
ەل ىشىندەگى ءتۇرلى وقيعالاردىڭ سەبەپ سالدارىن تالقىلاعان ايماق باسشىسى ەل اعالارىمەن ولقىلىقتاردى بولدىرماۋدىڭ جولدارىن اقىلداستى. جيىنعا ءتوراعالىق ەتكەن ءوڭىر باسشىسى وتكەن جىلدىڭ قورىتىندىسى بويىنشا وبلىسىمىزداعى قىلمىس سانى حالىق سانىنا شاققاندا 0,3 پايىزبەن رەسپۋبليكادا ەڭ سوڭعى 16 - ورىندا ەكەنىن ايتتى. سونداي- اق ول بولاشاقتا وسى كورسەتكىشتى تومەندەتۋ باعىتىندا ءتيىستى جۇمىستار اتقارىلاتىنىن ايتتى.
«بۇكىل قازاقستاننىڭ حالقى 18 ميلليون بولسا، وسىنشا حالىق كەيبىر دامىعان مەملەكەتتەردىڭ ءبىر عانا قالاسىندا ءومىر سۇرەدى. ولار مادەنيەتتى ءتاپ- ءتاۋىر، تاتۋ- ءتاتتى عۇمىر كەشىپ جاتىر. ال، ءبىز كەيدە ۇلانعايىر اتىراپقا سىيماي جاتامىز. ولاي بولمايدى. ىنتىماقپەن، باۋىرمالدىقپەن، تاتۋلىقپەن عۇمىر كەشۋىمىز كەرەك. سوندا عانا وركەندەگەن ەلدەردى قۋىپ جەتەمىز. بىزدە دە ءبىر ەل، ءبىر باسشى بار. ەندەشە ەلدە ءبىر جاعادان باس، ءبىر جەڭنەن قول شىعارىپ، بىرلەسە وتىرىپ مەملەكەتتىك باعدارلامالاردى ورىنداۋ جولىندا ايانباي ەڭبەك ەتەيىك»، - دەدى جانسەيىت قانسەيىت ۇلى.
وبلىس اكىمىنىڭ ءسوزىن قۋاتتاعان زيالىلار قوعامدا بالا تاربيەسىنە دەگەن جاۋاپكەرشىلىكتىڭ السىرەپ بارا جاتقانىن جاسىرمادى. ەل اعالارى ىنتىماق پەن بەرەكە بولماعان جەرگە قۇت قونبايتىنىن اتاپ ءوتتى.
«كۇندەلىكتى كۇيبىڭ تىرشىلىكپەن ارپالىسىپ ءجۇرىپ قازىرگى اتا انالار بالا تاربيەسىنە نەمقۇرايلى قارايدى. سونىڭ سالدارىنان وسىنداي جاعىمسىز جاعدايلار بولىپ جاتىر. ەل اراسىندا كورشى تۇرىپ، ءبىر- بىرىمەن سوتتاسىپ جاتقاندار دا بار. ەندى بۇل ماسەلەلەردە ءاربىر اۋىلداعى ارداگەر اعالار، اۋىل بيلەرى مەن زيالى قاۋىم وكىلدەرىنىڭ اتقاراتىن جۇمىسى وراسان بولماق. ىستەپ تە ءجۇر، ءبىراق ءالى دە جەتكىلىكسىز. سىزدەر ءوز اۋىلدارىڭىزدا وسىنداي جاعدايلاردى بولدىرماۋ ماقساتىندا بىرىگىپ، جاستارعا اقىل ايتىپ، توقتاۋ سالىپ وتىرساڭىزدار»، - دەدى وبلىستىق ارداگەرلەر كەڭەسىنىڭ ءتوراعاسى جەڭىسبەك ماۋلەنقۇلوۆ.
جيىن سوڭىندا ايماق باسشىسى «زورلىق- زومبىلىقسىز - وڭتۇستىك» اكسياسىن باستاۋدى ءجون سانايتىنىن ايتتى. وسى اكسيا اياسىندا بارشا اۋدان، قالا اكىمدىكتەرىنە زورلىق- زومبىلىقتىڭ، قىلمىس پەن قۇقىق بۇزۋشىلىقتىڭ الدىن الۋ بويىنشا كەشەندى جۇمىستاردى ۇيىمداستىرۋدى تاپسىردى. اعا بۋىن، زيالى قاۋىم وكىلدەرىن دە وسى باستاماعا قولداۋ كورسەتىپ، بەلسەندى جۇمىس ىستەۋگە شاقىردى.
