بريتاندىقتار قازاقستان حالقىنا مەرەكەلىك قۇتتىقتاۋلارىن جولدادى

قازاقستاننىڭ لوندونداعى ەلشىلىگى الەۋمەتتىك جەلىدە تۇماندى البيون تۇرعىندارى ناۋرىزعا وراي قازاقستاندىقتاردى قۇتتىقتاعان ۆيدەوروليك جاريالادى.

 ناۋرىز - كوكتەم مەيرامى جانە ورتالىق ازيا حالىقتارىنىڭ جاڭا جىلى. وكىنىشكە قاراي، عاسىرلار بويى جالعاسىپ كەلە جاتقان قاسيەتتى مەرەكەنى تويلاۋ كەڭەس زامانى كەزىندە ءۇزىلدى. قازاقستاندا دا تالاي جىلدار بويى بۇل ءدىني مەرەكە دەپ سانالىپ، تىيىم سالىندى. سوڭعى رەت 1926 -جىلى تويلانعان ناۋرىز مەيرامى ەلىمىزدە 1988 -جىلدان باستاپ قايتادان رەسمي تۇردە اتالا باستادى. 2001 -جىلى ناۋرىز مەيرامى مەملەكەتتىك مەرەكە رەتىندە جاريالاندى.

ەسكە سالايىق، كەشە ق ر پرەزيدەنتى نۇرسۇلتان نازاربايەۆ بارشا قازاقستاندىقتاردى ناۋرىز مەيرامىمەن قۇتتىقتاپ، «باعزى زاماننان كەلە جاتقان مەرەكە تاۋەلسىزدىكپەن بىرگە قايتا ورالدى. مىنەكي، تاۋەلسىزدىكتى العالى بەرى وسى ناۋرىزدى اتاپ كەلە جاتىرمىز. تۇبىندە بۇل ءبىزدىڭ نەگىزگى جاڭاجىلدىق مەرەكەمىز بولادى»، - دەگەن ەدى.

ايتا كەتەيىك، امەريكانىڭ «Humming House»  فولك- توبى دا ەرەكشە قۇتتىقتاۋ ارناپ، «ۇركەر» توبىنىڭ ءانشىسى ايدوس ساعاتوۆپەن بىرگە ايگىلى «ناۋرىز» ءانىن ورىنداعان بولاتىن.

 بۇدان بولەك، قازاقستاندىقتاردى ناۋرىزبەن لاتۆيا مەن گرۋزيا تۇرعىندارى قۇتتىقتادى. قۇتتىقتاۋ- بەينەجازباسىن ق ر سىرتقى ىستەر مينيسترلىگى باسپا ءسوز قىزمەتىنىڭ جەتەكشىسى ءانۋار جايناقوۆ فەيسبۋكتەگى ءوز پاراقشاسىندا جاريالادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى