اسىل دىنىمىزبەن ۇيلەسكەن مەرەكە باۋىرمالدىق پەن تاتۋلىققا ۇندەيدى - باس ءمۇفتي
«شۋاقتى كوكتەمنىڭ كەلگەنىن بىلدىرەتىن ناۋرىز - حالقىمىز ءۇشىن مەرەكەلى ءھام بەرەكەلى اي. قىستان شىعىپ، كوڭىلى كولدەي شالقىعان كوشپەلى جۇرتتىڭ تۇرمىسىندا ەرەكشە ورىن العان ۇلتتىق مەيرامىمىز وسى ايدىڭ ەنشىسىندە. ۇلىستىڭ ۇلى كۇنىندە جاسالاتىن ۇلتتىق ادەت- عۇرىپتاردىڭ ۇرپاققا بەرەر تاربيەسى مەن تاعىلىمى مول. اسىل دىنىمىزبەن ۇيلەسكەن ۇلتتىق مەرەكەمىز ادامزات بالاسىن باۋىرمالدىق پەن تاتۋلىققا، مەيىرباندىق پەن دوستىققا ۇندەيدى» ، - دەيدى سەرىكباي وراز.
باس ءمۇفتي دۇعاگوي اجەلەردىڭ جاساعان ناۋرىز كوجەسى - مەرەكەنىڭ ءمانىن كەلتىرەتىن نىشان ەكەنىن ايتا كەلە، شىن كوڭىل- نيەتپەن جاسالىپ، ۇسىنىلعان اس ادامدار اراسىندا مەيىرىمدىلىك پەن كەشىرىمدىلىك سىندى اسىل قاسيەتتەردى قالىپتاستىراتىنىن اتاپ وتكەن. بۇل كۇنى ۇلتتىق سپورت تۇرلەرىنەن ءتۇرلى جارىستار ۇيىمداستىرىلادى. «پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن) بالانى اتقا مىنگىزىپ، ساداق اتۋعا، سۋدا ءجۇزۋدى ۇيرەتىپ، كۇرەستىرۋدى وسيەت ەتكەن» ، - دەدى ءمۇفتيات ءتوراعاسى
سونداي- اق ول ناۋرىز مەيرامى كۇندەرى ساۋاپتى امالداردىڭ ءبىرى اعاش وتىرعىزۋ، كورشى- قولاڭ، قۇدا- جەكجات، اعايىن- تۋىستى ارالاپ، امان- ساۋلىق سۇراسۋ، كەشىرىم سۇراۋ، قايىرىمدىلىق جاساۋ ەكەندىگىن ايتادى.
«قادىرلى باۋىرلار، بارشاڭىزدى ۇلتىمىزدىڭ ۇلىق مەيرامى - ناۋرىز مەرەكەسىمەن قۇتتىقتايمىن! كۇللى تۇركى جۇرتىنىڭ ءتول تويى - ءاز ناۋرىز ەلىمىزدەگى ءتۇرلى ۇلتتى ۇيىمشىلدىققا ۇيىستىرىپ، كەشىرىم مەن مەيىرىمنىڭ مەرەكەسىنە اينالىپ كەلەدى. دوستىق پەن تاتۋلىقتىڭ، باۋىرمالدىقتىڭ، يگىلىك ءھام بىرلىكتىڭ، ىزگىلىك پەن ىزەتتىلىكتىڭ مەيرامى قۇتتى بولسىن! ۇلىس وڭ بولسىن، اق مول بولسىن. اللا تاعالا حالقىمىزعا ءارقاشان اماندىق، جۇرتىمىزعا تىنىشتىق ءناسىپ ەتكەي. تاۋەلسىزدىگىمىز باياندى بولعاي!» ، - دەلىنگەن قۇتتىقتاۋدا.
