دەنساۋلىق ساقتاۋ ءمينيسترى حالىق مەديتسيناسىنا سەنە مە

بۇل تۋرالى ق ر دەنساۋلىق ساقتاۋ ءمينيسترى ەلجان ءبىرتانوۆ ايتتى، دەپ حابارلايدى قازاقپارات ءتىلشىسى.

«مەديتسينالىق قىزمەتتەرگە قاتىستى ناقتى ستاندارتتار بار. حالىق مەديتسيناسى وعان كىرمەيدى. سوندىقتان ءبىز ونى مەديتسينالىق قىزمەت دەپ سانامايمىز. دەگەنمەن، حالىق تاراپىنان ارىز- شاعىمدار تۇسسە، ءبىز ءتيىستى شارالاردى قابىلدايمىز. ول ءۇشىن قوعامدىق دەنساۋلىقتى ساقتاۋ كوميتەتى بار»، - دەدى ەلجان ءبىرتانوۆ ۇكىمەت وتىرىسىنان كەيىنگى باسپا ءسوز ءماسليحاتىندا.

ءمينيستردىڭ ايتۋىنشا، بۇگىندە عىلىمي تۇرعىدا دالەلدەنگەن ەمدەۋ تاسىلدەرى مەديتسينالىق قىزمەتتەرگە كىرەدى. وعان مەملەكەتتىڭ ءوزى كەپىلدىك بەرەدى.

«سوندىقتان تەكسەرىستەن وتپەگەن، كوپ جاعدايدا، قاۋىپتى ەمدەۋ شارالارى ءۇشىن ازاماتتاردىڭ وزدەرى جاۋاپتى. حالىق مەديتسيناسىنان كەيىن اۋرۋدىڭ اسقىنۋ جاعدايلارى بولسا، ءبىز كومەك بەرۋگە دايىنبىز. ارىز- شاعىمداردى دا قاراستىرامىز. سەبەبى قوعامدىق دەنساۋلىقتى ساقتاۋ مىندەتى بىزگە جۇكتەلگەن. ازىرشە، حالىق مەديتسيناسى سالاسىندا قانداي دا ءبىر قاداعالاۋ، تىيىم سالۋ، ءيا بولماسا، رۇقسات بەرۋ بويىنشا ەشقانداي جوسپار جوق»، - دەپ اتاپ كورسەتتى ە. ءبىرتانوۆ.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى