قازاقپارات حالىقارالىق اقپارات اگەنتتىگى اقپارات الاڭىنداعى كوشباسشىلىعىن نىعايتا بەرمەك - اسقار ۋماروۆ
شارا بارىسىندا «قازاقپارات» اگەنتتىگىنىڭ 2017 -جىلعى قىزمەت قورىتىندىلارى مەن 2018 -جىلعا ارنالعان جوسپارلارى جاريا ەتىلدى.
«مەملەكەتتىك اقپارات اگەنتتىگى بولعاننان كەيىن، 2017 -جىلدىڭ قورىتىندىسىن جاريالاپ، 2018 -جىلعا جوسپارلارمەن ءبولىسۋدى ءجون كوردىك. بىلتىرعى جىل «قازاقپارات» ءۇشىن وتە جاقسى بولدى دەپ ايتۋعا بولادى. بۇل تۇرعىدا اقپارات جانە كوممۋنيكاتسيالار مينيسترلىگى تاراپىنان ەلەۋلى قولداۋ جاسالدى. 2017 -جىلى «قازاقپارات» سايتىن پايدالانۋشىلار 21 پايىزعا ءوسىپ، ءبىزدىڭ ناقتى اۋديتوريامىز، ياعني بىرەگەي پايدالانۋشىلار 12 ميلليونعا جەتتى» ، - دەپ توقتالدى اسقار ۋماروۆ.
سونىمەن قاتار باس ديرەكتور اگەنتتىك شەتەلگە اقپارات تاراتۋعا دا ەرەكشە ءمان بەرىپ وتىرعانىن ايتا كەلە، «قازاقپارات» جاڭالىقتارى ءتورت تىلدە 227 ەلگە تارالىپ جاتقانىن جەتكىزدى.
«توتە جازۋ نۇسقاسى دا جاقسى جولعا قويىلعان. وسى ورايدا، نەگىزگى اۋديتوريامىز قىتاي مەن يراندا. سايكەسىنشە، بۇل باعىتتاعى كورسەتكىشتەر ارتىپ كەلەدى» ، - دەپ ناقتىلادى ا. ۋماروۆ.
ايتا كەتەيىك، الەۋمەتتىك جەلىدە اگەنتتىكتىڭ پاراقشاسىنا جازىلۋشىلار سانى ءۇش ەسەگە دەيىن ارتتى. 2017 -جىلى 18 تاقىرىپتىق جوبالار، web4 جوبا جۇزەگە استى. سونداي- اق بىلتىر «فوتوبانك» (photobank.inform.kz) قۇرىلىپ، وندا تاريحي فوتوسۋرەتتەر جيناقتالدى، قازىرگى زامانعى فوتوسۋرەتتەردىڭ جاڭا بازاسى قالىپتاستى.
«بىزدە جاڭا فورماتتار ىسكە قوسىلىپ جاتىر. ونىڭ ىشىندە بىلتىر العاشقى رەت «KazLiveInform» ۆيدەواقپاراتتاردىڭ جاڭا فورماتى بويىنشا جۇمىس باستالدى. ۆيدەوكونتەنت ۇلەسى 10 پايىزعا ءوستى. مۇنىمەن قوسا، Sport.Inform.kz سپورتتىق پورتالى ىسكە قوسىلعانىن ەسكە سالعىم كەلەدى جانە ول ءوز كەزەگىندە تانىمال بولا باستادى. جوبا ينۆەستورلار قارجىسى ەسەبىنەن جۇزەگە اسىرىلدى، ياعني بۇعان مەملەكەتتىك قارجى جۇمسالمادى» ، - دەدى ول.
2017 -جىلى شەتەلدىك اقپارات اگەنتتىكتەرىمەن 18 مەموراندۋمعا قول قويىلدى. شەتەلدىك سەرىكتەستەر سايتىنا 120 دان استام ماتەريال ورنالاستىرىلىپ، ارىپتەستەرمەن كونتەنت جانە باننەر الماسۋ اتقارىلدى.
«رۋحاني جاڭعىرۋ» باعدارلاماسى بويىنشا «قازاقپارات» ءبىراز جۇمىس اتقاردى. ءبىرقاتار ارنايى جوبالاردى ىسكە اسىردىق. اتاپ ايتقاندا، الداعى جىلى ءوز قىزمەتىمىزدى كەڭەيتۋدى كوزدەپ وتىرمىز. بۇل تۇرعىدا اعىلشىن جانە قىتاي رەداكتسيالارىنىڭ كونتەنتىن ارتتىرۋ جوسپارلانۋدا. سەبەبى اۋديتوريالىق ۇلكەن سۇرانىس بار. سالىستىرمالى تۇردە ايتساق، «قازاقپارات» سايتىن پايدالانۋشىلار قاتارىندا ءتورتىنشى ورىندا ۋكراينا بولسا، بۇگىندە بۇل ورىنعا فرانسيا كوتەرىلدى. نەگىزى، اعىلشىن تىلىندەگى قازاقستاننان تارالعان اقپاراتتارعا قىزىعۋشىلىق ارتىپ كەلە جاتقانىن اڭعاردىق. وسى ورايدا كۇن سايىن ءتيىستى مونيتورينگ جۇرگىزىپ كەلەمىز» ، - دەدى اسقار ۋماروۆ.
