باسپانا قىمباتتاپ كەتپەس ءۇشىن نە ىستەۋ كەرەك - ساراپشى پىكىرى
ق ر ۇ ە م «ەكونوميكالىق زەرتتەۋلەر ورتالىعىندا» وتكەن دوڭگەلەك ۇستەلدە الەمدىك ەكونوميكا جانە ساياسات ينستيتۋتىنىڭ جەتەكشى ساراپشىسى ايجان مۇقىشبايەۆا وسىنداي پىكىر ءبىلدىردى، دەپ حابارلايدى «قازاقپارات» ح ا ا ءتىلشىسى.
«ەلباسى ءوز باستاماسىندا «7-20-25» باعىتىندا پايىزدىق مولشەرلەمەنىڭ 7 پايىزدان اسپاۋى كەرەكتىگىن ناقتى ايقىنداپ كورسەتتى. ياعني، العاشقى جارنا 20 پايىز بولادى دا، ءۇي 25 جىلعا دەيىن بەرىلەدى. بۇل رەتتە قازىرگى تاڭدا ساراپشىلاردىڭ اراسىندا كوپ تالقىلانىپ جاتقان ماسەلە - وسى 7 پايىزدىق مولشەرلەمە ءۇيدىڭ باعاسىنىڭ قىمباتتاۋىنا الىپ كەلۋى مۇمكىن. سول سەبەپتى، بۇگىنگى كۇنى مەنىڭ ۇسىناتىنىم - وسى باعدارلامانى وڭىرلىك تۇرعىدا قاراستىرۋ كەرەك. ياعني، قازاقستاندا 14 وبلىس پەن ەكى ءىرى قالا بار. ءار ءوڭىردىڭ الەۋمەتتىك-ەكونوميكالىق جاعدايىنا، حالىقتىڭ ساتىپ الۋ قابىلەتتىلىگىنە بايلانىستى قاراستىرۋ كەرەك دەپ ويلايمىن»، - دەيدى ايجان مۇقىشبايەۆا.
ونىڭ ايتۋىنشا، يپوتەكا پورتفەلىن قارايتىن بولساق، ونداعى 50 پايىز نەسيەلەر استانا مەن الماتىعا تيەسىلى، ال قالعان وڭىرلەردىڭ ۇلەسى ودان تومەن.
«استانا مەن الماتى قالالارىندا اتالعان باعدارلاما بويىنشا بەرىلەتىن يپوتەكانى تەك جاڭا ۇيلەرگە بەرىلەتىندەي ەتىپ نەسيەنى شەكتەۋ كەرەك دەپ ويلايمىن. سەبەبى، ول باعالاردىڭ ءوسىپ كەتۋىنە اكەلۋى مۇمكىن. ال قالعان وڭىرلەردى تەك جاڭا ۇيلەرمەن شەكتەلمەي، بۇرىنعى ۇيلەردى دە قوسا وتىرىپ، سۇرانىس پەن ۇسىنىستىڭ ۇيلەسىمىن تابۋ كەرەك. ويتكەنى، استانا مەن الماتىدا قۇرىلىس قارقىندى جۇرگەنىمەن، باسقا وڭىرلەردە سالىنىپ جاتقان جاڭا ۇيلەر از. سوندىقتان، بۇرىن سالىنعان ۇيلەردى دە قوسا وتىرىپ، وڭىرلەردىڭ اراسىندا ديففەرەنتسيالدى ساياسات جۇرگىزۋ كەرەك»، - دەدى ايجان مۇقىشبايەۆا.
