ءساۋىر ايىندا ايازدى كۇندەر بولادى - قازگيدرومەت
«الداعى ءساۋىر ايى جىلى ءارى جاۋىن-شاشىندى بولادى دەپ كۇتىلىپ وتىر. اسىرەسە، بۇل قۇبىلىس ايدىڭ ءبىرىنشى جانە ەكىنشى ون كۇندىگىندە ءجيى بايقالادى. سونداي-اق، ءساۋىر ايىندا جىلى جانە سۋىق كۇندەر الماكەزەك بولاتىنىنا بايلانىستى قۇبىلمالى كۇن رايى كۇتىلەدى. ول كەزدە ەڭ تومەنگى تەمپەراتۋرالار ءبىرىنشى ون كۇندىكتىڭ سوڭىنا قاراي بولادى. ەلىمىزدىڭ سولتۇستىك وڭىرلەرىندە اۋانىڭ تۇنگى تەمپەراتۋراسى 5-15 گرادۋسقا، كۇندىز 0-5 گرادۋسقا دەيىن تومەندەيدى. ال ەلىمىزدىڭ وڭتۇستىك بولىگىندە اۋانىڭ تۇنگى تەمپەراتۋراسى 0-5 گرادۋس جىلى، 5-10 گرادۋسقا دەيىن تۇسەدى»، - دەدى «قازگيدرومەت» ر م ك ۇزاق مەرزىمدى اۋا رايى بولجامى باسقاراماسىنىڭ باسشىسى گۇلميرا اقىشەۆا استانادا وتكەن باسپا ءسوز ءماسليحاتىندا.
ونىڭ ايتۋىنشا، ءساۋىردىڭ ورتاسى مەن ءۇشىنشى ون كۇندىكتىڭ ورتا شەنىندە ورتالىق ازيادان كەلەتىن جىلى اۋا ماسسالارىنا بايلانىستى جىلى كۇن رايى ورنايدى. سولتۇستىك ايماقتاردا اۋا تەمپەراتۋراسى 15-23 گرادۋسقا دەيىن جوعارىلاسا، وڭتۇستىكتە 20-28 گرادۋسقا دەيىن جىلىنادى.
«ءبىراق ءساۋىر ايىندا اۋا-رايى ءالى دە الدامشى بولعاندىقتان، بۇنداي جىلى كۇندەر ۇزاققا سوزىلمايدى. ءۇشىنشى ون كۇندىكتىڭ باسىندا جانە سوڭىنا قاراي كۇن رايى قايتادان سۋىتا تۇسەدى. ەلىمىزدىڭ سولتۇستىك ايماقتارىندا جاۋىن-شاشىندى بولادى. تۇندە اۋانىڭ تەمپەراتۋراسى 0 دەن تومەن، كۇندىز 5-15 جىلىلىقتى كورسەتەدى. ال وڭتۇستىك وڭىرلەردە وتكىنشى جاۋىن جاۋىپ، نايزاعاي كۇركىرەيدى. اۋانىڭ تۇنگى تەمپەراتۋراسى 5-10 گرادۋس جىلى، كۇندىز 15-20 دەيىن كوتەرىلەدى»، - دەپ اتاپ كورسەتتى گ. اقىشەۆا.
