دەمالماي جۇمىس ىستەگەنى ءۇشىن ايىپپۇل سالىندى - فوتو
ونداي ادامدار جۇمىسسىز قالسا، ەكى قولىن قايدا سيدىرارىن بىلمەي، تاعات تاپپايدى. فرانسۋز ناۋبايحاناسىندا ورىن العان مىنا وقيعا بۇل سوزىمىزگە دالەل بولا الادى. ناۋبايشى دەمالىسسىز جۇمىس ىستەيمىن دەپ ايىپتى بولىپ، ايىپپۇل ارقالادى.
ول دەمالىسسىز جۇمىس ىستەپ، ەلدىڭ ەڭبەك زاڭناماسىن بۇزعان. فرانسيانىڭ سولتۇستىك- شىعىسىندا ورىن تەپكەن ليۋزيني- سۋر- بارس شاعىن قالاسىندا ناۋبايشى بولىپ جۇمىس ىستەيتىن سەدريك ۆەرۆە تاياۋ ماڭداعى قورىققا اعىلعان تۋريستەردىڭ كوپتىگىنە بايلانىستى جەتى كۇن بويى، ياعني، ءبىر اپتا بەل جازباي جۇمىس ىستەۋىنە تۋرا كەلگەن ەدى. فرانسيانىڭ زاڭناما تالابى بويىنشا شاعىن كاسىپورىندارعا اپتاسىنا التى كۇننەن ارتىق جۇمىس ىستەۋگە تىيىم سالىنعان. بۇل زاڭ تالابى جۇمىسشىنى شەكتەن تىس پايدالانۋعا توسقاۋىل قويۋ ماقساتىندا قابىلدانعان ەدى.
سەدريك ۆەرۆە بۇل تىيىمعا قاراماي، زاڭ تالابىن بۇزعانى ءۇشىن 3 مىڭ ەۋرو ايىپپۇل ارقالادى. ناۋبايحاناشىنىڭ ءوزى ايىپپۇل تولەۋدەن باس تارتىپ وتىر. «مەن تەك ءوز جۇمىسىمدى ىستەدىم» دەپ اقتالدى.
ونىڭ بۇل شەشىمىن 2 مىڭنان اسا ادام قولداپ وتىر. وعان ناقتى قولداۋ كورسەتۋ ءۇشىن ونلاين رەجيمدە پەتيتسيا ۇيىمداستىرىپ جاتىر. سونداي- اق اتالعان قالا باسشىسى دا ناۋبايحاناشىنى جاقتاپ وتىر. ونىڭ ايتۋىنشا، مۇنداي زاڭ شاعىن بيزنەستىڭ اياعىنا تۇساۋ سالادى. وسىلاي دەگەن قالا باسشىسى اتالمىش زاڭدى شىعارعاندارمەن جولىعۋعا بەل بايلاپ وتىر. بۇعان قوسا، ەل ەكونوميكاسىنا پايدا كەلتىرىپ وتىرعان تۋريستەر قاراسىنىڭ ازايۋىنا اسەر ەتەتىنىن العا تارتىپ وتىر.
ءسوز ورايى كەلگەندە ايتا كەتۋ كەرەك، نان جابۋ فرانسيادا مەملەكەت تاراپىنان قاتتى قاداعالاناتىن سالاعا جاتادى. 1995 -جىلدان باستاپ، ناۋبايحاناشىلارعا جىلىنا بەس اپتا دەمالۋ مىندەتتەلگەن. بۇل تالاپتى ورىنداۋ ءۇشىن جەرگىلىكتى بيلىك وكىلدەرىنە ناۋبايحانا قىزمەتىن قاداعالاپ وتىرۋعا قۇقىق بەرىلگەن.
