قازاقستاندىق پاراليمپياداشىلار پحەنچحانداعى ويىندارمەن قوش ايتىستى

الەمدىك شارانىڭ جابىلۋ سالتاناتى كارىس مانەرىندە ۇيىمداستىرىلدى. الدىمەن، كارىس ۇلتتىق كيىمىمەن ورتاعا شىققان جەرگىلىكتى ەسترادا جۇلدىزدارى ءان شىرقادى. ودان كەيىن الىپ ەكراندا پاراليمپيادا ويىندارىنىڭ ەڭ ەستە قالارلىق ساتتەرى كورسەتىلدى. الىپ ەكرانداعى كورسەتىلىم اياقتالعاننان كەيىن ورتاعا پاراليمپيادا ويىندارىنىڭ اڭىزعا اينالعان جۇلدىزدارى شىعىپ، كورەرمەننىڭ قوشەمەتىنە بولەندى.

ءبىر ساعاتقا جۋىق ۋاقىتقا سوزىلعان شارا سيفرلىق ارنايى نومىرلەرمەن، مۇمكىندىگى شەكتەۋدى جاندار تۋرالى ۆيدەوروليكتەرمەن، سونىمەن قاتار ومىرلىك كەدەرگىلەردى جويىپ قانا قويماي، كاسىبي سپورتشى اتانعان ەرەكشە ادامداردىڭ رۋحى جايلى فلەشموبتارمەن كوپتىڭ ەسىندە قالدى.

جابىلۋ سالتاناتىنىڭ مەرەكەلىك بولىگىنەن كەيىن حالىقارالىق پاراليمپيادا ويىندارى كوميتەتىنىڭ پرەزيدەنتى ەندريۋ پارسونس بارلىق سپورتشىلارعا العىسىن ءبىلدىرىپ، ويىنداردىڭ ەستە قالارلىق تۇستارىن ەسكە سالىپ، پاراليمپيادا ويىندارى-2018 سايىسىن جابىق دەپ جاريالادى.

شوۋدىڭ شارىقتاۋ شەگىندە پاراليمپيادا ويىندارىنىڭ وتى ءسوندىرىلىپ، مۋزىكالىق كونسەرت باستالىپ كەتتى.

ەسكە سالا كەتسەك، پاراليمپيادا ويىندارى-2018 سايىسىندا قازاقستاندىق الەكساندر كوليادين التىن مەدال جەڭىپ العان بولاتىن. بۇل جەڭىس - قازاقستاندىق پاراليمپياداشىلار ءۇشىن تۇڭعىش بيىك جەتىستىك بولىپ تىركەلىپ وتىر.

جالپى كوماندالىق ەسەپتە ءبىزدىڭ قۇراما 20- ورىنعا تابان تىرەدى. قازاقستان سپورتشىلارىمەن بىرگە قىتاي قۇراماسىنىڭ دا ءبىر التىن مەدالى بار.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى