وزبەكستاندا ناۋرىز مەرەكەسىن تويلاۋ باستالدى

العاشقىلار قاتارىندا تاشكەنت وبلىسىنىڭ قازاقستانمەن شەكتەسىپ جاتقان شىناز اۋدانى مەرەكەنى باستادى. اۋداندا نەگىزىنەن وزبەكتەر، قازاقتار، سونداي- اق باسقا دا ۇلت وكىلدەرى تۇرادى.

شىنازدىقتار بيىل ناۋرىزعا ەرەكشە دايىندالدى. ويىن- ساۋىق ءوتىپ جاتقان ورتالىق ستاديون مەرەكەگە ساي ەتىپ بەزەندىرىلدى. حالىق مۋزىكالىق اسپاپتارىنىڭ داۋسى جاڭعىرىپ، سۋمالاك، ءحالىم، كوكسامسا سياقتى ۇلتتىق تاعامدار مەن سالت- داستۇرلەر قوناقتارعا تارتىلدى.

اۋدان اكىمدىگى دايىنداعان مۋزىكالىق جانە كوركەمدىك كومپوزيتسيالار تابيعاتتىڭ ويانۋى مەن كوپتەن كۇتكەن كوكتەمنىڭ كەلگەنىن بايانداعانداي.

شىناز اۋدانىنىڭ اكىمى اكمالحان ماديەۆ جينالعان جۇرتتى مەرەكەمەن قۇتتىقتادى. «شىناز اۋدانى قازاقستانمەن شەكتەسىپ جاتىر. كوپۇلتتى اۋدانىمىزدا 30-دان استام ۇلت جانە ۇلىس وكىلدەرى تاتۋ- ءتاتتى ءومىر ءسۇرىپ كەلەدى. ولاردىڭ بارشاسى ءۇشىن ناۋرىز - ورتاق ۇلتتىق مەيرام. كەشە عانا قازاقستاندا وزبەكستان جىلى باستالعانى وتە قۋانىشتى وقيعا بولدى. سونىڭ ارقاسىندا باۋىرلاس قازاقستانمەن بايلانىستارىمىز ودان ءارى نىعايا تۇسۋدە. وعان شىنازدىقتاردىڭ دا قۋانىشىندا شەك جوق»، - دەيدى اكىم.

ناۋرىزعا ارنالعان مەرەكەلىك باعدارلاما اياسىندا بوكس، كاراتە جانە كۇرەستىڭ كىشكەنتاي شەبەرلەرى ونەر كورسەتتى.

ەرەكشە ايتا كەتەرلىگى، ءسۇتبۇلاق اۋىلىنان كەلگەن جاس قازاق ونەرپازداردىڭ اسەم بيلەرى مەن قۇيقىلجىتا سالعان اندەرى جينالعانداردى تامساندىردى. ال ناۋرىزعا ارنايى تىگىلگەن اپپاق كيىز ۇيدە قوناقتارعا ەت، باۋىرساق، ناۋرىزكوجە سەكىلدى قازاقتىڭ ۇلتتىق تاعامدارى تارتىلدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى