استانادا ناۋرىز مەيرامىن تويلاۋ باستالدى
دەپ حابارلايدى استانا قالاسىنىڭ رەسمي سايتى.
تانىمال قازاقستاندىق ارتىستەر جينالعان قاۋىمنىڭ نازارىنا كونسەرتتىك باعدارلاما ۇسىندى. كلارا تولەنبايەۆا، دوسىمجان تاڭاتاروۆ، اسقار جايلاۋبايەۆ سىندى وتاندىق ەسترادا جۇلدىزدارى، «دابىل»، «سارى ارقا»، «ءداۋىر»، «رەترو»، «بۋم» توپتارى، «الامان» جانە «Z» تريولارى، «ديارت» جانە «باستاۋ» ۇجىمدارى تانىمال ەسترادالىق اندەر مەن حالىق كومپوزيتورلارىنىڭ اندەرىن ورىندادى.
بۇدان باسقا، حالىقارالىق فەستيۆالدەردىڭ جەڭىمپازدارى، استانا قالاسى مەملەكەتتىك اكادەميالىق فيلارمونياسىنىڭ انشىلەرى پەريزات تۇراروۆا، جانارگۇل راحات قىزى، جاقسىكەلدى ماياساروۆ، حالىقارالىق جانە رەسپۋبليكالىق كونكۋرستاردىڭ لاۋرەاتى، پرەزيدەنتتىك وركەستردىڭ ءانشىسى ايزات قارابەكوۆا، دومبىراشى قۇرمانعازى بايتاسوۆ، ءانشى ءمادينا احمەتوۆا، سونداي- اق ولجاس ءسابيجان، ايگەرىم حاسانوۆا، اسەم وماروۆا، ايدانا سماحانوۆا جانە باۋىرجان نۇرىمبەتوۆ تە كەلۋشىلەرگە كەرەمەت كوڭىل- كۇي سىيلادى.
«ىڭكارىم» حورەوگرافيالىق ۇجىمىنىڭ دارىندى ارتيستەرى «شاشۋ»، «كوكتەم» بيلەرىن بيلەدى. «شالدار كۇرەسى» مەن فلەشموبتار كوپشىلىكتى ءتانتى ەتتى، ۇلكەن- كىشىنىڭ ءبارى قوسىلىپ «قارا جورعا» ءبيىن بيلەدى. جينالعاندار ءۇشىن ارقان تارتۋ، گىر كوتەرۋ جانە ارمرەستلينگتەن جارىستار ۇيىمداستىرىلدى. كەيبىرى توعىزقۇمالاق ۇلتتىق زياتكەرلىك ويىنىن ويناپ، ءتۇرلى ۇلتتىق سالت- داستۇرلەردى تاماشالادى.
ادەمى بەزەندىرىلگەن كيىز ۇيلەر، پالاۋ، باۋىرساق پەن مەرەكەنىڭ باستى تاعامى - حوش ءيىستى ناۋرىز كوجە - وسىنىڭ بارلىعى اۋدانداردىڭ تۇرعىندارىنا ۇمىتىلماس مەرەكەلىك كوڭىل سىيلادى.
«ءبىز اۋداندا وتكىزىلەتىن ناۋرىزعا ارنالعان كونسەرتكە جىل سايىن قۋانا كەلەمىز. مەرەكەلىك كوڭىل- كۇي سىيلاعاندارى ءۇشىن ۇيىمداستىرۋشىلار مەن ارتيستەرگە العىسىمدى بىلدىرەمىن. بارشاڭىزعا جاڭا جىلدا دەنساۋلىق پەن بار جاقسىلىقتى تىلەيمىن»، - دەدى كونسەرتتى كورۋگە كەلگەن جەلەزنودوروجنىي تۇرعىن الابىنىڭ تۇرعىنى بازارگۇل قارابەكوۆا.
«بىزگە وسىنداي شارالار ۇنايدى. جازدا دا ءبىزدىڭ اۋداندا كەرەمەت كونسەرت ۇيىمداستىرىلدى. كوڭىل- كۇيىمىز كوتەرىڭكى، سۋىق بولسا دا، كۇننىڭ كوزى جارقىراپ تۇر. كونسەرتكە بالالارمەن، كورشىلەرىمىزبەن، دوستارىمىزبەن بىرگە، بۇكىل وتباسىلارىمىزبەن كەلدىك. ناۋرىز مەيرامىن اۋدانىمىزدا ءبىرىنشى بولىپ اتاپ وتكەنىمىز جاقسى، 21-22 - ناۋرىزدا قالانىڭ باستى الاڭدارىندا وتەتىن مەرەكەلىك ءىس- شارالارعا دا بارا الامىز»، - دەدى ينتەرناتسيونالنىي تۇرعىن الابىنىڭ تۇرعىنى اسەمگۇل سۇلەيمەنوۆا.
تانىمال ءانشى پەريزات تۇراروۆا تۇرعىن الاپتارىنىڭ بارلىق تۇرعىندارىن جانە استانالىقتاردى كوكتەمنىڭ شۋاقتى مەرەكەسى - ناۋرىز مەيرامىمەن قۇتتىقتادى.
«ءبىز ءوز اندەرىمىزبەن تۇرعىندارعا كوتەرىڭكى كوڭىل- كۇي سىيلاي الدىق دەپ ويلايمىن. بارلىق قازاقستاندىقتاردى ناۋرىز مەرەكەسىمەن قۇتتىقتايمىن، ەلىمىزدىڭ گۇلدەنۋىن تىلەيمىن»، - دەدى ءانشى.
ەرتەڭ، بۇگىن ساعات 11.00-دە، ناۋرىز مەيرامى قۇرمەتىنە حالىقتىق سەرۋەندەر ميچۋرينو جانە پرومىشلەننىي تۇرعىن الاپتارىندا وتەدى، ال 21 - ناۋرىزدا پريگورودنىي جانە ۇركەر تۇرعىن الاپتارىندا، 22 - ناۋرىزدا كوكتال-1 جانە ءوندىرىس تۇرعىن الاپتارىندا، 23 - ناۋرىزدا سارايشىق شاعىن اۋدانىندا جالعاسىن تابادى.
