ساپاربايەۆ: ءوز ويىنشىلارىمىز بولسا عانا فۋتبول داميدى

«ءبىز ءارۋاقىتتا فۋتبولدى قولداعانبىز، قولدايمىز دا. كەيىنگى كەزدە فۋتبولدىڭ توڭىرەگىندە اڭگىمە كوپ. سول اڭگىمەگە نۇكتە قويۋ ءۇشىن مەنىڭ ايتاتىنىم، وبلىس باسشىلارى ءاردايىم فۋتبولدى قولدايدى.

فۋتبول تازا بولۋعا ءتيىس، وندا ەشقانداي كوممەرتسيا بولماۋ كەرەك. ءبىزدىڭ كوماندادا اقتوبەنىڭ ازاماتتارى ويناۋ كەرەك. كەشە قىزىلوردادا بولعان ويىندا اقتوبەلىك ويىنشىلار شىقتى. «قايسار» دا جامان كوماندا ەمەس، اقتوبەلىكتەردەن قۇرالعان كوماندا وزدەرىن دالەلدەدى»، - دەدى ساپاربايەۆ.

وبلىس اكىمى بەس بىردەي فۋتبول الاڭى بار جابىق سپورت كەشەنىنىڭ اشىلۋىنا قاتىسقان بولاتىن. 800 بىردەي بالانىڭ جاتتىعۋىنا مۇمكىندىك جاسالعان الاڭدا قىس كەزىندە دە فۋتبول ويناۋعا مۇمكىندىك جاسالعان.

«سپورتشىلاردىڭ ارقاسىندا ەلدىڭ تۋى كوتەرىلەدى، گيمن وينايدى. ونىڭ ىشىندە فۋتبولدىڭ ورنى بولەك. فۋتبول حالىقتىڭ جاقسى كورەتىن ويىنى. اسىرەسە، ءبىزدىڭ اقتوبەدە فۋتبولعا كوپ كوڭىل بولىنەدى. اقتوبە فۋتبول كلۋبىنىڭ وسىعان دەيىن قانداي ورىندا بولعانىن، بەدەلىن سىزدەر بىلەسىزدەر. كەيىنگى كەزدە ازداپ تومەندەپ قالدى، ونىڭ دا سەبەپتەرى بار.

ءبىز فۋتبولدى دامىتامىز دەسەك، بالالاردى فۋتبولمەن اينالىستىرۋىمىز كەرەك. ءوز ويىنشىلارىمىز بولسا عانا فۋتبول داميدى. ءبىزدىڭ فۋتبول اكادەمياسىن قۇرعانداعى دا ماقساتىمىز وسى. بارلىق اۋداندارىمىزدا فۋتبول اكادەمياسىنىڭ فيليالدارى قۇرىلادى. ماتەريالدىق بازاسىن نىعايتۋىمىز كەرەك»، - دەدى اكىم.

اقتوبەلىكتەرگە ارنالعان سپورت الاڭىندا قىزدار فۋتبولى دا بولادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى