شىعىس قازاقستان وبلىسىنداعى وزەندەردى «جارىپ» جاتىر
«مۇنىڭ الدىندا وزەن ارناسىنا مۇز كەپتەلىپ، قىزىل سۋ جايىلاتىن ورىندار انىقتالعان بولاتىن. سول ورىنداردى جارىلعىش زاتتار ارقىلى مۇزدان ارشۋ جۇمىستارى باستالدى» - دەيدى وبلىستىق توتەنشە جاعدايلار دەپارتامەنتىنىڭ باسپا ءسوز قىزمەتى.
سوڭعى ءۇش كۇندە شەمونايحا جانە بورودۋليحا اۋداندارىندا مۇز قاتقان ارنالارعا جارىلعىش زاتتار قويىلعان بولاتىن. بۇل ەكى اۋدانعا اسىرەسە ۇبە وزەنى قاۋىپ تۋعىزۋى مۇمكىن. ماماندار جارىلىستىڭ كوبى وسى وزەننىڭ بويىندا جاسالعانىن ايتادى.
كەيبىر جارىلىستار ەلدى مەكەندەرگە جاقىن اۋماقتا وتەتىندىكتەن، قوپارۋ جۇمىستارى بەلگىلى ءبىر ۋاقىت ارالىعىن ساقتاپ ۇيىمداستىرىلۋدا. بۇل ءوز كەزەگىندە مۇزدى ارشۋ جۇمىستارىن باياۋلاتۋدا. ويتپەگەن جاعدايدا تەربەلىستەر سۋدىڭ ارنادان اسۋىنا اكەپ سوقتىرۋى مۇمكىن.
«بۇگىنگى جارىلىستار ۋبينكا جانە ۆەرح- ۋبا اۋىلدارىنىڭ ماڭىندا ءوتتى. شەمونيحا قالاسىنا كىرە بەرىستەگى كوپىر ماڭىن دا مۇزدان ارشىدىق» - دەيدى شەمونايحا اۋدانى اكىمدىگىنىڭ ازاماتتىق قورعانىس جانە جۇمىلدىرۋ دايىندىعى جونىندەگى باس ينسپەكتورى ەۆگەني پەسچاننيكوۆ.
توتەنشە جاعداي قىزمەتى وڭىردە جاعداي تۇراقتى بولعاندىقتان، وزەندەردى «جارۋ» جۇمىستارى جالعاساتىنىن ايتتى.
اۆتور: ەسىمجان ناقتىباي
