يۋنەسكو ناۋرىز مەيرامىن اتاپ ءوتتى
يۋنەسكو- نىڭ شتاب- پاتەرىندەگى ءىس- شارانى اۋعانستان، ازەربايجان، يراك، يران، قازاقستان، پاكىستان، تاجىكستان، تۇرىكمەنستان جانە تۇركيانىڭ دەلەگاتسيالارى بىرلەسە وتكىزدى. وعان ديپلوماتيالىق، ساياسي جانە ىسكەرلىك توپتاردىڭ، ونەر، عىلىم جانە ءبىلىم بەرۋ سالالارىنىڭ، ناۋرىزدى تويلايتىن ەلدەردىڭ فرانسياداعى دياسپورالارىنىڭ تانىمال وكىلدەرى قاتىستى.
ءىس- شارانىڭ اشىلۋىندا سويلەگەن يۋنەسكو باس ديرەكتورىنىڭ ورىنباسارى گەتاچيەۆ ەنگيدا بارشانى كەلە جاتقان مەيراممەن قۇتتىقتاپ، 2016 -جىلى 12 مەملەكەتتىڭ ۇسىنىمىمەن ناۋرىز مەيرامىن تويلاۋ ءداستۇرى ادامزاتتىڭ ماتەريالدىق ەمەس مۇراسىنىڭ رەپرەزەنتاتيۆتى تىزىمىنە ەنگىزىلگەنىن ەرەكشە اتاپ ءوتتى.
«ەجەلدەن كەلە جاتقان كوكتەم مەن جاڭارۋدىڭ وسى جارقىن مەرەكەسى بارلىق حالىقتارعا جاقىن بەيبىتشىلىك پەن ادام جانە تابيعات اراسىنداعى ۇيلەسىمدىلىكتىڭ قۇندىلىقتارىن ناسيحاتتايدى» ، - دەدى ول.
جينالعان قوناقتارعا ارنالىپ قاسيەتتى دومبىرادا كۇي شەرتىلدى. ۇلتتىق اسپابىمىزدا كۇي ورىنداۋ ونەرى دە 2014 -جىلى يۋنەسكو- نىڭ ماتەريالدىق ەمەس مۇرا تىزىمىنە ەنگىزىلگەن بولاتىن. وتانداسىمىز ءاليبي بايتوقانىڭ ورىنداۋىندا قۇرمانعازىنىڭ «بالبىراۋىن» جانە سەكەن تۇرىسبەكوۆتىڭ «كوڭىل تولقىنى» سياقتى تاماشا شىعارمالارى ورىندالدى.
سونىمەن قاتار، تانىستىرىلىم بارىسىندا ءاربىر دەلەگاتسيا ءوزىنىڭ ۇلتتىق تاعامدارىن ۇسىندى. قازاق داستارحانىمەن تانىسقان قوناقتار ناۋرىز كوجە، قازى، جايا، ءمانتى، سامسا، باۋىرساق، قۇرت، جەنت پەن ىرىمشىكتەن ءدام تاتتى.
پرەزەنتاتسياعا جينالعاندار مادەنيەت، عىلىم جانە ءبىلىم بەرۋ سالاسىنداعى ىرگەلى حالىقارالىق ۇيىمنىڭ باس پاتەرىندە، الەمنىڭ جەتەكشى مادەني ورتالىقتارىنىڭ بىرىندە ناۋرىزدى اتاپ ءوتۋ كوكتەم مەن رۋحاني جاڭعىرۋىمىزدىڭ وسىنداي تاماشا مەيرامىن تويلايتىن قازاقستاننىڭ جانە باسقا دا كورشىلەس ەلدەردىڭ باي مۇراسىن ناسيحاتتاۋعا تاماشا مۇمكىندىك بولعانىن اتاپ ءوتتى.
