ورتالىق ازيا تاعامدارى برەندىن قالىپتاستىرۋ كەرەك

ۇسىنىس بويىنشا قازاقستاننىڭ العاشقى سەرىكتەسى وزبەكستان بولۋى مۇمكىن.

«وزبەكستاندىق ارىپتەستەرىمىزگە تاعامدارىمىزدى ءبىر برەندپەن ناسيحاتتاۋدى ۇسىنىپ وتىرمىز. بۇكىل الەمنىڭ ساياحاتشىلارى قازاقشا ەتتى، وزبەكشە پالاۋدى، ۇيعىرشا لاعمان جانە وزگە دە ورتالىق ازيا تاعامدارىن ءبىر داستارحاننان تاتا الاتىنداي مۇمكىندىك جاساۋىمىز كەرەك. مۇنداي مىسالدار الەمدە جەتەرلىك. مىسالى، يتاليالىق اسحانا، فرانسۋز اسحاناسى بار، سونىمەن بىرگە ءبارىن بىرىكتىرەتىن ەۋروپالىق اسحانا بار. ازەربايجان، گرۋزين جانە ارميان تاعامدارى كاۆكاز اسحاناسى رەتىندە تانىمال. بىزدە دە باۋىرلاس ەلدەردىڭ اسحاناسى تولىققاندى قالىپتاستى، ونى ورتالىق ازيا اسحاناسى دەپ اتاۋعا ابدەن بولادى»، - دەپ ۇسىنىس ءبىلدىردى « Kazakh Tourism » ۇك» اق باسقارما ءتوراعاسى راشيد كۇزەمبايەۆ استانادا وتكەن قازاقستان- وزبەكستان تۋريستىك فورۋمىندا.

ونىڭ ايتۋىنشا، ورتالىق ازيا ەلدەرى ءوز تاعامدارىن تانىمال تۋريستىك ونىمگە اينالدىرۋى ءتيىس. بۇل ءۇشىن قازاقستان ورتالىق ازيا تاعامدارىنىڭ فەستيۆالىن كەزەكپەن وتكىزۋدى ۇسىنادى.

«باستاماشى ەل رەتىندە العاشقى تاعامدار فەستيۆالىن شىمكەنتتە وتكىزە الامىز. ويتكەنى، شىمكەنتتە بارلىق رەسۋرس بار جانە الەۋەتى تولىققاندى جەتەدى»، - دەيدى ر. كۇزەمبايەۆ.

ۇلتتىق كومپانيا كەلتىرگەن دەرەكتەرگە سايكەس، سوڭعى بىرنەشە جىلدا گاسترونوميالىق تۋرلارعا سۇرانىس ۇلعايدى جانە الەمدىك تۋريزمنىڭ 30 پروتسەنتىن قۇراپ وتىر. تۋريستەردىڭ 79 پروتسەنتى جولعا شىقپاس بۇرىن ەلدىڭ تاعامى مەن تاعامعا قاتىستى شارالار كۇنتىزبەسىن قارايدى.

فوتو: kazah.info

اۆتور: ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى