ريمدەگى باۋ-باقشانى ميگرانتتار باپتايدى
قابىلداۋ ورتالىقتارىنداعى بوسقىن مارتەبەسىن الۋعا ۇمىتكەرلەر قالانى كوگالداندىرۋ جۇمىستارىنا جاۋاپتى. قازىر ءبىرىنشى توپتا ءوز ەركىمەن قىزمەت ەتكىسى كەلەتىن 20 ادام بار. ولار ءۇش اي بويى اپتاسىنا ەكى رەت بۇتالاردى قىرقىپ، گۇل وتىرعىزادى. تۇسكەن جاپىراقتاردى تازالاپ، كوممۋنالدىق قىزمەت كورسەتۋشىلەرگە دە كومەكتەسەدى. بۇل جۇمىس ءۇشىن سىياقى قاراستىرىلماعان. شارانى حالىقارالىق قىزىل كرەست ۇيىمى مەن ريم قالاسىنىڭ اكىمشىلىگى قولعا العان. جوبانىڭ باستى ماقساتى - ميگرانتتاردى قوعامدىق جۇمىستارعا تارتىپ، ەلگە پايدا اكەلۋ. يتالياداعى بيۋروكراتيانىڭ اسەرىنەن كەلىمسەكتەردىڭ باسپانا الۋ جونىندەگى وتىنىشتەرى جىلداپ قارالادى. ال قۇجاتسىز ولار جۇمىسقا دا ورنالاسا المايدى. قابىلداۋ ورتالىقتارىنىڭ تۇرعىندارى جاڭا كاسىپتى ۇيرەنۋ مەن ورتاعا پايدا اكەلۋ جونىندەگى باستامانى اسا قىزىعۋشىلىقپەن قابىلدادى. قازىر ەكىنشى توپقا جازىلۋ باستالدى.
- ءبىزدىڭ باستى ماقساتىمىزدىڭ ءبىرى - بوسقىن مارتەبەسىن الۋعا ۇمىتكەر ازاماتتاردىڭ جۇمىس ىستەۋگە نيەتتى ەكەنىن كورسەتۋ. ءبىز ولاردى ءوز قالامىزدا جاقسى قابىلدايمىز، ەشقانداي قىسىم جاسالمايدى. ال ولار ادال جانە پاراساتتى ازامات رەتىندە استانامىزدىڭ كوركەيۋىنە اتسالىسۋى ءتيىس، - دەيدى قىزىل كرەست ۇيىمىنىڭ قىزمەتكەرى فلاۆيا كۋنيولو.
